Հայաստանում հաստատված 12 000 սիրիահայերի 80 տոկոսը գործազուրկ է եւ վարձով է բնակվում` սպառման եզրին գտնվող խնայողությունների հաշվին: Այս մասին այսօր «Հայացք» մամուլի ակումբում հայտնեց հալեպահայ, ՍԴՀԿ Հայաստանի վարչության փոխատենապետ Վազգեն Մեսրոպյանը:
Ըստ նրա` ԱԺ-ն պետք է արտահերթ նիստ գումարի սիրիահայերի համար. «Կցանկանայի, որ մեր պատգամավորները քննարկեն ու սիրիահայերի խնդրով մի խելացի բան ասեն գոնե` «կռիվներ» անելու փոխարեն: Փառք Աստծո, բոլորն էլ բիզնեսներ ունեն, թող այդ բիզնեսներից մի փոքր հատված հատկացնեն սիրիահայերին, մարդիկ աշխատեն: Ոչ մի անգամ սիրիահայն օգնության կարիք չի ունեցել, տարիներ շարունակ օգնել է հայաստանաբնակներին, բայց այսօր ինքն օգնության կարիք ունի: Այս հինգ տարում ՀՀ ԱԳՆ-ն մի անգամ այցելեց Սիրիա, բայց թե ինչ խոսեց ու արեց` ոչ մեկ չգիտի»:
Մեսրոպյանը նկատեց` սիրիահայերը գոհ են եւ երախտապարտ, որ ապրում են խաղաղ երկրում, բայց աշխատանք չունենալու պատճառով արտագաղթում են Հայաստանից. «Ինչո՞ւ պետք է սիրիահայ բարերարը հինգ բնակարան գնի-նվիրի սիրիահայերին: Որոշները սեփական գործն են փորձում զարգացնել. աշխատավարձը քիչ է, բայց մարդիկ աշխատում են, ուզում են աշխատել: Հասկանում ենք` ՀՀ քաղաքացիներն էլ են քիչ աշխատավարձով աշխատում: Եթե սիրիահայ ես, չի նշանակում, թե հարյուրավոր դոլարների աշխատավարձ պետք է ստանաս, բայց մեծ մասը գործազուրկ են: Ըմբռնումով են մոտենում խնդիրներին, բայց հիմա իրենք օգնության կարիք ունեն»:
Կարդացեք նաև
Մեսրոպյանը դժգոհեց, որ եզակի պատգամավորներ են հետաքրքրվել սիրիահայերի խնդիրներով, սակայն անուններ չհրապարակեց: Նաեւ նշեց, որ պետական կառույցների միայն Սփյուռքի նախարարությունն է որոշակի խնդիրներում օժանդակում սիրիահայերին:
Անդրադառնալով Թուրքիայի հայտարարություններին, թե ցանկանում է կարգավորել հարաբերությունները Սիրիայի հետ, Վազգեն Մեսրոպյանն ասաց. «Սիրիահայերը վստահ են, որ Թուրքիային չի կարելի վստահել: Եթե այդպես է, Թուրքիան իր սահմանը կփակեր, ոչ թե կթույլատրեր չեչեն, ուզբեկ, ադրբեջանցի եւ թուրք ահաբեկիչների ու զինամթերքի մուտքը Սիրիա»:
Լուիզա ՍՈՒՔԻԱՍՅԱՆ
