Հայաստանի բնակչության կառուցվածքի ուսումնասիրության վիճակագրությունը ցույց է տալիս, որ մինչև 18 տարեկանների գերակշիռ մեծամասնությունը տղաներ են, 19 տարեկանից տարբեր սեռերն արդեն կենսաբանորեն նույն հարթության վրա են գալիս: 21 տարեկանից սկսած աղջիկ-տղա համամասնության մեջ ավելանում է աղջիկների թիվը:
«Զարկերակ» մամուլի ակումբում լրագրողների հետ հանդիպմանը Վիճակագրական ծառայության մարդահամարի և ժողովրդագրության բաժնի պետ Կարինե Կոյումջյանը նշեց. «Նորման այն է, որ 100 աղջկա հաշվով 102-106 տղա երեխա պետք է ծնվի, սակայն 1993-1994-ից սկսած շեղում է նկատվում, որն իր գագաթնակետին է հասել 2000-ականներին:
Դառնալով պտղի սեռով պայմանավորված աբորտների վերաբերյալ ցուցանիշներին` տիկին Կոյումջյանը նշեց, որ ցուցանիշները բարձր են Արմավիրի, Արարատի, Շիրակի և Տավուշի մարզերում: Միայն Վայոց ձորում է, որ պատկերը հակառակն է. 100 աղջկա հաշվով 93 տղա է ծնվել :
«Երիտասարդ բժիշկների հայկական ասոցիացիա» ՀԿ նախագահ Գևորգ Գրիգորյանն էլ, հիշատակելով ՄԱԿ-ի զեկույցը, նշեց. «Մենք այսօր ունենք 40.000 ավել ծնված տղա երեխա: Սա նշանակում է, որ ունենք բավականին խորացված խնդիր»:
Կարդացեք նաև
Մանկաբարձ-գինեկոլոգ Պավել Սոցկին կարևորեց այն, որ կինը գիտակցի աբորտների բացասական հետևանքները. «Դա կարող է հորմոնալ համակարգի շեղման հանգեցնել, արգանդում առաջացած կպումների, մինչև անգամ անպտղության»:
Մանկաբարձ-գինեկոլոգը փոխանցեց, որ հղիության ընդհատման պատճառների շարքում բարձր տոկոս կազմում են ամուսնությունից դուրս հղիությունները, որոնք ցանկալի հղիություններ չեն: Այդ քայլին դիմում եմ երիտասարդ աղջիկները, որոնք չեն ամուսնացել ու չեն էլ պատրաստվում և ունեցել են պատահական սեռական կապ:
Տաթև ՀԱՐՈՒԹՅՈՒՆՅԱՆ
