Ազգային ժողովի ԲՀԿ խմբակցության ղեկավար Նաիրա Զոհրաբյանը Խորենացի փողոցում տեղի ունեցող իրադարձությունների վայր միայն 3-րդ օրն իր այցելությունը պատճառաբանեց այն հանգամանքով, որ 3 օր է՝ իրենց ասում են՝ չենք թողելու, չեք գնալու. «Ուրեմն այստեղ, այսպես ասած, արտոնյալ անձինք չպիտի լինեն»:
Հիշեցնենք, որ պատգամավորներից միայն Նիկոլ Փաշինյանն է ամեն օր այցելել Խորենացի փողոց եւ նաեւ երկու անգամ մուտք գործել «Սասնա ծռեր» խմբի կողմից զինված հարձակման միջոցով գրաված պարեկապահակային ծառայության գնդի տարածք:
Նաիրա Զոհրաբյանին եւ ԲՀԿ խմբակցության պատգամավոր Միքայել Մելքումյանին այսօր ոստիկանները թույլ չտվեցին ներս մտնել ՊՊԾ տարածք:
Զոհրաբյանի խոսքերով՝ «Որպես Եվրոպայի խորհրդի խորհրդարանական վեհաժողովի պատգամավոր, երեկվանից վեհաժողովի մեր գործընկերներն էլ են անհանգիստ: Հիմա ի՞նչն է խնդիրը, ասացի պատրաստ ենք հեռախոսներն էլ հանձնենք, մտածում եք՝ պիտի կինո նկարենք եւ այլն, եւ այլն»:
Կարդացեք նաև
Պատգամավորն ասաց, որ ուզում էին ներս մտնել գնդի տարածք, տեսնել ինչ իրավիճակ է, զրուցեին, հետ գային.
«Գնում եմ օմբուդսմենի հետ հանդիպման, որ ոստիկաններն ասել են կոշիկիս ծերը մի հատ համբուրեք: Հիմա էդ ամեն ինչը պիտի հասկանանք: Գիտեք ինչ, երբ ասվում է՝ բանակցություն է գնում, դուք կարող է խանգարեք, լավ, օքեյ, մենք չենք եկել խանգարելու: Ես գտնում եմ, որ եթե ինչ-որ մի փուլի քաղաքական գործիչները կարող են լիցքաթափմանը նպաստել, մենք էլ փորձենք, չի ստացվի՞, կասնեք՝ լավ, դուք ձեր գործը շարունակեք»:
Մանրամասն՝ տեսանյութում
Խնդրի լուծման տարբերակը Զոհրաբյանը միայն խաղաղ ճանապարհն է տեսնում: Իսկ թե որն է այդ խաղաղ ճանապարհը, Զոհրաբյանն ասաց. «Դե, ես որ գնայի, խոսեի, կարող է հասկանայինք: Դրա համար եմ ասում, եթե հիմա ինչ-որ մի հանգրվանի ենք եկել, եկեք հնարավոր բոլոր տարբերակները փորձենք: Ես չեմ ասում՝ գնացի, ուրեմն խնդիրը լուծվելու է: Իհարկե, ես իմ վրա միսիոներական առաքելություն չեմ վերցնում, բայց մենք էլ գնանք խոսենք»:
Aravot.am-ի հարցին՝ Նիկոլ Փաշինյանն առաջարկել է խորհրդարանում որեւէ ձեւաչափով այս խնդիրը քննարկել, սակայն մինչ այժմ որեւէ արձագանք չկա, ի՞նչ կարծիք ունեք, Զոհրաբյանն ասաց, որ բոլոր հնարավոր միջոցները պետք է օգտագործել:
Մեր մյուս հարցին էլ՝ ազգային անվտանգության ծառայություններն առաջին օրերին զինված խմբին ահաբեկիչներ անվանեցին, արդյոք նրանք ահաբեկիչնե՞ր են ըստ պատգամավորի, Զոհրաբյանն ասաց. «Ես Պավլիկին ճանաչում եմ, ահաբեկիչ գնահատական չեմ տա: Բայց նորից եմ պնդում՝ այս տարբերակով հարցեր չեն լուծվելու: Մենք նաեւ հասկանում ենք, որ հուսահատության հասած մարդը ելքը սա է փնտրում: Ում դուրը գա, ում դուրը չգա, մենք պետք է կանխենք բախումը»:
Aravot.am-ի այն հարցին էլ՝ ինչի՞ մասին է խոսում երկրի նախագահի եւ ՀՀԿ-ի՝ այս իրավիճակի մասին որեւէ հայտարարությամբ հանդես չգալը, Նաիրա Զոհրաբյանն ասաց. «Ես Էդուարդ Շարմազանովը չեմ»:
Նելլի ԲԱԲԱՅԱՆ
