Ազգագրագետ Հրանուշ Խառատյանը Սերժ Սարգսյանի ելույթը համարում է խնդիրներին ու իրավիճակին արագ արձագանքող, բայց ոչ խորքային:
«Սերժ Սարգսյանից հաճախ ենք լսել՝ ժամն է եկել դասեր քաղելու: Սա լսեցինք, 2008 թվականին, 2013-ին եւս շարունակում էնք լսել, բայց բացի ձեւակերպումից, երբեք էլ դասեր քաղելու ժամը չի եկել, իսկ որո՞նք են այդ դասերը: Նա նաեւ ասաց, որ մենք շուտով պետք է ունենանք համաձայնության կառավարություն: Նույնիսկ այդ բառն է ինձ վախեցնում, որովհետեւ դատելով իշխանության վերադասավորվածություններից, վստահության կառավարությունը վտանգավոր կլինի: Դա անձնական կամ կուսակցական խմբերի փոփոխություն է»,- այսօր «Հոդված 3» ակումբում ասաց Հրանուշ Խառատյանը:
Անդրադառնալով ելույթում ԼՂՀ հակամարտությանը վերաբերող հատվածին, տիկին Խառատյանը նկատեց, որ չկար հստակ մոտեցում. «Սերժ Սարգսյանն ասաց՝ կյանքի գնով էլ լինի ես Ղարաբաղ չեմ տալու: Սա ի՞նչ է նշանակում՝ գնալու եք եւ զոհվելու ե՞ք, շատերը կարող են գնալ, զոհվել»:
Իսկ ելույթը ներկայացնելու ձեւը տիկին Խառատյանին հաղթահանդես է հիշեցրել. «Իշխանության ու մտավորականության ներկայացուցիչները հասարակության ներկայացուցիչներ չեն, այդ հաղթահանդեսի կազմակերպման ձեւն էր հետաքրքիր, մասնակիցները եկան, լսեցին, ծափահարեցին, գնացին: Որեւէ քննարկման փորձ, հարց չկար, սա նույնպես վավերացնում է, որ մեր երկրի կառավարիչները, նախագահը կամք չունի նույնիսկ իր կողմից ընտրված ներկայացուցիչների հետ որեւէ հարց քննարկել, նա մեր երկրում վերջակետ է դնում ցանկացած քննարկման»:
Արփինե ՍԻՄՈՆՅԱՆ
Կարդացեք նաև
