«Սովորելը պետք է չլինի դժվար, պետք է լինի հետաքրքիր: Ուսանող-դասախոս հարաբերությունները պետք է ազնիվ լինեն, ծանոթներով չպետք է քննություն ստանան, սովորական լեկցիա գրել չպետք է լինի, լաբորատորիաներ պետք է լինեն եւ այլն»,- այսօր ԱԺ Գիտության, կրթության, մշակույթի, երիտասարդության և սպորտի հարցերի մշտական հանձնաժողովի նիստում հայտարարեց ԱԺ պատգամավոր Թեւան Պողոսյանը`հիմնավորելով «Բարձրագույն և հետբուհական մասնագիտական կրթության մասին» եւ «Կրթության մասին» ՀՀ օրենքներում իր առաջարկած փոփոխությունները: Դրանք ենթադրում են կրթական ոլորտում միասնական պետական քաղաքականություն, կրթության բնագավառում պետական քաղաքականության միասնական չափանիշների սահմանում և բարձրագույն ուսումնական հաստատություններում ընդունելության պայմանների ու պահանջների հավասար դաշտի ապահովում: Պատգամավորը գտնում է նաեւ, որ պետք է հավասար դաշտ ստեղծել ստացիոնար եւ հեռակա ուսուցման դիմորդների համար:
ՀՀԿ-ական պատգամավոր Կարինե Աճեմյանը նկատեց, որ կառավարության օրակարգում քննական համակարգն արմատապես վերանայելու ծրագիր կա, ուստի եթե գործընկերոջ առաջարկներն անգամ ընդունվեն, ապա դրանք շատ կարճ են ծառայելու նպատակին:
ՀՀ ԿԳ նախարար Լևոն Մկրտչյանն էլ իր խոսքում հավելեց, որ կառավարությունում մշակվում են «Բարձրագույն և հետբուհական մասնագիտական կրթության մասին» օրենքում արմատական փոփոխությունները: Դրանք օրենսդիրի դատին կներկայացվեն նոյեմբերին: Նախարարը հույս հայտնեց, որ այս խորհրդարանը մինչեւ տարեվերջ`իր լիազորությունների ավարտը, կընդունի այդ նախագիծը` գիտակցելով, որ արվող փոփոխությունները կարեւոր են ոլորտի համար:
Կարդացեք նաև
Նա հիշեց, որ 1990-ականներին նման օրինակ եղել է, երբ ընդունվել է «Կրթության մասին» ՀՀ օրենքը: «Օպտիմիստական եք»,- նախարարին դիմեց ՀՀԿ-ական պատգամավոր Կարինե Աճեմյանը: Թեւան Պողոսյանն էլ կես կատակ-կես լուրջ հավելեց. «Մարդիկ չգիտեն մի շաբաթ հետո իրենց հետ ի՞նչ է լինելու…»:
Ըստ նախարարի` նախատեսվող փոփոխություններով պարտադիր է լինելու գոնե մեկ առարկայի համար միասնական քննությունը: Դա կլինի հայոց լեզվի քննությունը: Քննարկվում է նաեւ առաջին հայտի գերակայությունը պահվելու տարբերակը, ինչը նաեւ մասնագիտական տեսանկյունից է կարեւոր: Ըստ Լեւոն Մկրտչյանի` նախարարությանն առավելապես վերահսկողի դեր պետք է ապահովի` բյուրոկրատական աշխատանքը թողնելով բուհերին:
Թեւան Պողոսյանի նախագիծը դրական եզրակացության արժանացավ, ընդգրկվեց մեծ օրակարգ, բայց լիագումար նիստերում դեռ չի քննարկվի` մինչեւ բերվեն կառավարության նախատեսած փոփոխությունները:
Նելլի ԳՐԻԳՈՐՅԱՆ
