«Ինձ համար գործելու է խաղի մեկ կանոն՝ դա ՀՀ օրենքն է»,- այսօր խորհրդարանում, լրագրողների հետ զրույցում ասաց ՀՀ գլխավոր դատախազի թեկնածու Արթուր Դավթյանը`հավաստիացնելով, որ Հայաստանում անպատժելի մարդիկ չեն լինելու եւ հանրությունը դրա ականատեսը կլինի:
Այս համատեքստում, լրագրողներից մեկը նկատեց`նախորդ գլխավոր դատախազի օրոք Սյունիքի մարզպետ Սուրիկ Խաչատրյանն ու նրա որդին չպատժվեցին, հնարավո՞ր է ինքն էլ նույն գործելաոճը շարունակի: «Ուրեմն օրենքով նախատեսված հիմքեր չեն եղել, որ չի դատել»,- պատասխանեց Արթուր Դավթյանը:
Անդրադառնալով խորհրդարանի ամբիոնից իր հասցեին հնչող քննադատություններին, Արթուր Դավթյանն ասաց, որ դրանց ըմբռնումով է մոտենում, իր համար առանձնացնում է «առողջ ու օբյեկտիվ» քննադատությունները`հետագայում, գլխավոր դատախազի պաշտոնում ընտրվելու դեպքում, այդ քննադատություններից յուրաքանչյուրն արժանանալու է իր ուշադրությանը: Մասնավորաբար, «Հարսնաքարի գործով» իր հասցեին հնչող քննադատությունների առնչությամբ՝ Արթուր Դավթյանն ասաց, որ իր կարծիքով՝ այդ դեպքով իրապես ապահովվել է քրեական գործի ամբողջականությունը, բազմակողմանիությունն ու օբյեկտիվությունը եւ հանրության պահանջի կատարումը:
Նելլի ԳՐԻԳՈՐՅԱՆ
