Երեկ կայացած Պուտին-Էրդողան հանդիպման ժամանակ ակտիվ բանակցություններ են ընթացել Սիրիայի հարցով: Այս մասին այսօր «Արմենպրես»-ում լրագրողների հետ հանդիպման ժամանակ ասաց արեւելագետ, թուրքագետ Ռուբեն Սաֆրաստյանը:
«Քննարկվել են Սիրիայի հետ կապված խնդիրներ, թեեւ հրապարակայնորեն չասվեց այդ մասին: Երկու կողմերը համարում են, որ պետք է շարունակեն ջանքերը` Հալեպի բնակչությանն օգնություն ցույց տալու ուղղությամբ: Ըստ երեւույթին, Թուրքիան չի միանում Արեւմուտքին, որը սուր քննադատում է Ռուսաստանի քաղաքականությունը Սիրիայի խնդրում: Թուրքիան փաստորեն դուրս է մնում Արեւմուտքի ջանքերի շրջանակից»:
Ըստ թուրքագետի, Պուտին-Էրդողան հանդիպմանը քննարկվել են նաեւ թուրքական զինուժի գործողությունները Սիրիայում. «Պայմանավորվել են առաջիկայում ավելի խորը բանակցություններ անցկացնել եւ դրանք տեղափոխել նաեւ ռազմական ոլորտ: Թուրքիան հյուսիսում գրավել է Սիրիայի մի տարածք (Սիրիա ներխուժման ընթացքում` «Եփրատի վահան» գործողությամբ.-խմբ): Ռուսաստանն, ըստ էության, չի քննադատում այդ քայլը, դեմ չէ: Նախատեսվում է, որ մոտ ապագայում բանակցություններ կընթանան երկու երկրների Գերագույն շտաբերի, Պաշտպանության նախարարությունների, հետախուզության ղեկավարների միջեւ: Այսինքն, փորձում են ընդհանուր գործողությունների համար հիմք ստեղծել Սիրիայում: Սա երկուսի շահերից է բխում, Թուրքիան հնարավորություն է ստանում իր ռազմական գործողությունները Սիրիայում շարունակել, օրինակ, քրդական հարցի առնչությամբ»:
Կարդացեք նաև
Լուիզա ՍՈՒՔԻԱՍՅԱՆ
