Ադրբեջանի արտաքին գործերի նախարար Ջեյհուն Բայրամովի և Մեծ Բրիտանիայի արտաքին գործերի, համագործակցության և զարգացման հարցերով պետքարտուղար Էդ Միլիբենդի միջև այսօր հեռախոսազրույց է տեղի ունեցել։ Ադրբեջանի ԱԳՆ-ի հաղորդմամբ՝ հեռախոսազրույցի ընթացքում քննարկվել են ադրբեջանա-բրիտանական հարաբերությունների ներկայիս վիճակն ու զարգացման հեռանկարները, ինչպես նաև բարձր մակարդակով քաղաքական երկխոսության շարունակման կարևորությունը։
Այս համատեքստում ընդգծվել է երկու երկրների առաջնորդների հանդիպման նշանակությունը, որը տեղի է ունեցել Եվրոպական քաղաքական համայնքի (EPC) վերջին գագաթնաժողովի շրջանակում, ինչպես նաև Ադրբեջանի և Մեծ Բրիտանիայի և Հյուսիսային Իռլանդիայի Միացյալ Թագավորության միջև ռազմավարական գործընկերության մասին համատեղ հռչակագրի ընդունման կարևորությունը երկկողմ հարաբերությունների զարգացման գործում։ Կողմերը մտքեր են փոխանակել փաստաթղթում ընդգրկված ուղղություններով համագործակցությունը կոնկրետ բովանդակությամբ հարստացնելու և գործնական արդյունքների հասնելու հեռանկարների շուրջ։
Քննարկվել են նաև տարածաշրջանային անվտանգության հարցերը։ Կողմերը մտքեր են փոխանակել Հարավային Կովկասում ներկա իրավիճակի և Ադրբեջանի ու Հայաստանի միջև հարաբերությունների կարգավորման գործընթացի վերաբերյալ։
Ըստ ադրբեջանական կողմի՝ Բայրամովը զրուցակցին տեղեկացրել է տարածաշրջանում կայուն խաղաղության և կայունության ապահովման, հաղորդակցությունների բացման և տնտեսական համագործակցության ընդլայնմանն ուղղված Ադրբեջանի ջանքերի մասին։ Հեռախոսազրույցի ընթացքում քննարկվել են նաև փոխադարձ հետաքրքրություն ներկայացնող տարածաշրջանային և միջազգային այլ հարցեր։
Կարդացեք նաև
factor.am



















































