«Մեդիա և իրավունք» հասարակական կազմակերպությունը դիմել է Ազգային ժողովի Էթիկայի հարցերով ժամանակավոր հանձնաժողով՝ պատգամավորներ Սուքիաս Ավետիսյանի և Արկադի Համբարձումյանի վարքագծի վերաբերյալ:
Նշյալ պատգամավորները խախտել են ԱԺ կանոնակարգ օրենքի 6.1-րդ հոդվածի 2-րդ մասի «ա» և «գ» կետերով նախատեսված էթիկայի կանոնները, այսինքն՝ քվեարկել են ուրիշ պատգամավորների փոխարեն:
Դիմումին կից հանձնաժողովին ենք ներկայացրել տեսանյութեր, որոնք փաստում են պատգամավորական էթիկայի խախտման մասին:
Կարդացեք նաև
Հաշվի առնելով այն հանգամանքը, որ ԱԺ «Հանրապետական» խմբակցության նույն պատգամավոր Սուքիաս Ավետիսյանը, ով քվեարկել է գործընկերոջ փոխարեն, տվյալ հանձնաժողովի նախագահն է, մտահոգված ենք, որ վերջինս օբյեկտիվ չի գտնվի իր վարքագծի վերաբերյալ հարցի քննարկման ժամանակ:
Կարծում ենք, որ դիմումի քննությունը հանձնաժողովի նախագահի կողմից խնդրահարույց է շահերի բախման տեսանկյունից: Ուստի հիշեցնում ենք, որ կա նախադեպային որոշում, որը կայացվել է տվյալ հանձնաժողովի կողմից, երբ ուրիշի փոխարեն քվեարկած յոթ պատգամավորների վարքը համարվել էր էթիկայի խախտում, որից հետո ԱԺ-ի կողմից ընդունվել էր օրենքի փոփոխություն՝ սահմանելով համապատասխան պատժամիջոցներ:
Եթե Սուքիաս Ավետիսյանը չի կարող ընդունել իր կողմից էթիկայի խախտման փաստը, հորդորում ենք չմասնակցել որոշման կայացման ընթացքին:
«Մեդիա և իրավունք» հասարակական կազմակերպություն
