Այսօր հրավիրած ասուլիսում «Համախմբում» կուսակցության առաջնորդ, պատգամավոր Վարդան Օսկանյանը անդրադարձավ 3 կարեւոր հարցերի՝ տնտեսություն, ԼՂՀ հիմնահարց եւ ՀՀ-ի տեղն ու դերը տարածաշրջանում:
ԼՂՀ հարցին անդրադառնալով՝ նա ասաց. «Մեզ բարդ բանակցություններ են սպասվում եւ լուրջ, մտահոգիչ խնդիրներ կան: Մեր հիմնական խնդիրն այսօր պետք է լինի, որ մենք արդեն բանակցային փաստաթղթում ամրագրված ԼՂՀ ժողովրդի ինքնորոշման իրավունքից անցնենք արդեն շատ ավելի գործնական՝ արդեն 25 տարի այդ իրավունքի կիրառված լինելու փաստի քննարկման: Սա հնարավոր է անել ճիշտ դիվանագիտության դեպքում: Մենք երբեք չպետք է թույլ տանք, որ միջնորդները փորձեն շեղեն քննարկումների թեման եւ տանեն դեպի տարածքների վերադարձ: Սա շատ վտանգավոր ճանապարհ է լինելու: Մեր խնդիրն է լինելու շեշտադրումները ճիշտ դնել: Դրա համար նախաձեռնությունը պետք է մերը լինի»:
Ըստ Օսկանյանի, մի բանում մենք պետք է համոզված ու վստահ լինենք՝ վերջապես այդ շեշտադրումների պարտադրումը եւ ընդհանրապես ԼՂՀ հարցի լուծման բանալին գտնվում է միայն եւ միայն Երեւանում եւ Ստեփանակերտում եւ մենք ինքներս պետք է որոշենք մեր հայրենիքի սահմանները:
Խոսելով ՀՀ-ի՝ տարածաշրջանում տեղի եւ դերի մասին, նա ասաց, որ մեր շուրջը միջանցքներ, առանցքներ են ձեւավորվում, տրանսպորտային նոր ուղղություններ, մի բան ակնհայտ է՝ մենք իսպառ բացակայում ենք այդ բոլորից: Սա շատ վտանգավոր է. «Կոմպլեմենտարիզմը, որպես մեր արտաքին քաղաքականության հայեցակարգային հենք, պետք է հետ վերադարձվի եւ մենք պետք է վերանայենք, առաջնային դարձնենք Վրաստանի հետ մեր հարաբերությունների խորացումը՝ ընդհուպ մինչեւ ինտեգրացիոն գործընթացների սկսումը: Մեզ համար սա ամենաճիշտ եւ ամենաիրականանալի քայլն է, այնտեղ է գտնվում այս տարածաշրջանում մեր ներգրավման բանալին»:
Կարդացեք նաև
Հռիփսիմե ՋԵԲԵՋՅԱՆ
