ԱԺ-ն 102 կողմ, 3 դեմ ձայների հարաբերակցությամբ ընդունեց «ՀՀ պաշտպանության ժամանակ զինծառայողների կյանքին կամ առողջությանը պատճառված վնասների հատուցման մասին» օրենքի նախագիծը, որով նախատեսվում է յուրաքանչյուր աշխատողից ամսական 1000 դրամ պարտադիր վճար գանձել՝ զինծառայողների համար:
ՀԱԿ խմբակցության պատգամավոր Հրանտ Բագրատյանը մինչ քվեարկությունը ցավ հայտնեց, որ ՀԿ-ն իրեն հզոր է կարծում եւ իր խոսքերով՝ «բանի տեղ չի դնում» ուրիշների կարծիքը: Նա հայտարարեց, որ չի մասնակցելու քվեարկությանը. «Զոհված եւ վիրավորված զինվորների հարցը պետք է լուծել, բայց ափսոսս գալիս է, որ նման ձեւով օրինագիծ է ներկայացվում, որը հակասում է Սահմանադրությանը»:
Սա այն բացառիկ օրինագծերից էր, որի քվեարկության ժամանակ որեւէ պատգամավոր ուրիշի փոխարեն չքվեարկեց: Անգամ Առաքել Մովսիսյանը ցուցադրաբար փակեց իր կողքի բացակա ընկերոջ համակարգիչը՝ ցույց տալով, որ նա չի եկել, ինքն էլ միայն իր կոճակը սեղմեց:
3 դեմ քվեարկողները ՀԱԿ խմբակցության ղեկավար Լեւոն Զուրաբյանը, խմբակցության քարտուղար Արամ Մանուկյանը եւ «Ժառանգության» պատգամավոր Զարուհի Փոստանջյանն են:
Հիշեցնենք, որ երեկ ՊՆ նախարար Վիգեն Սարգսյանը խնդրել էր պատգամավորներին, որ իրենց մեջ ուժ գտնեն եւ եթե դեմ են նախագծին, գոնե չքվեարկեն, որովհետեւ դա վատ ազդակ է լինելու զինվորներին, որոնք հետեւում են այս նախագծին:
Հռիփսիմե ՋԵԲԵՋՅԱՆ
