Հայաստանի պաշտպանության փոխնախարար Դավիթ Փախչանյանն առաջարկել է երկրում ստեղծել ռուսական ռազմական տեխնիկայի, մասնավորապես Տ-72 տանկերի արդիականացման կենտրոն: Այս մասին նա հայտարարել է Երևանում հանրապետության գործարար շրջանակների և Ռուսաստանի առևտրի և արդյունաբերության նախարար Դենիս Մանտուրովի հետ հանդիպմանը:
Ինչպես հաղորդում է Lenta.ru-ն, Փախչանյանը նշել է, որ Հայաստանը գործարար կապեր ունի «Ուրալվագոնզավոդի» հետ: Տեխնիկայի վերանորոգումն իրականացվում է տեղի ձեռնարկություններում, սակայն արդիականացմամբ զբաղվում է հենց «Ուրալվագոնզավոդը»:
«Մենք կցանկանայինք մեզ մոտ ոչ միայն վերանորոգել ռազմական տեխնիկան, օրինակ` Տ-72 տանկերը, այլև արդիականացնել դրանք: Քանի որ Ռուսաստան ուղարկելու դեպքում արդիականացումը արժենում է գրեթե տանկի գնին հավասար»,- պարզաբանել է փոխնախարարը՝ հավելելով, որ համագործակցության ներուժ կա նաև լազերային տեխնիկայի, ռադիոֆիզիկայի և կապի ոլորտներում:
Մանտուրովն իր հերթին նշել է, որ Ռուսաստանը պատրաստ է քննարկել հայկական ձեռնարկությունների առաջարկը և խնդրել է տրամադրել պաշտպանական արդյունաբերության այն ձեռնարկությունների ցանկը, որոնք ունեն համագործակցության համար ներուժ:
Կարդացեք նաև
Պատրաստեց՝ Վիկտորյա ԱՆԴՐԵԱՍՅԱՆԸ
