Արկտիկական ցուրտ օդի եւ հզոր անտիցիկլոնի ներթափանցման հետեւանքով Հայաստանում օդի ջերմաստիճանը շարունակում է շատ ցածր արժեք ունենալ: Այս պահին այն կլիմայական նորմայից ցածր է 10-15 աստիճանով: Այդ մասին armtimes.com-ին հայտնեց ՀՀ ԱԻՆ «Հիդրոմետ» ծառայության օդերեւութաբանության կենտրոնի պետի տեղակալ Գագիկ Սուրենյանը:
«Արդեն ժամը 13:00-ն է, բայց Աշոցքում դեռ -24 աստիճան է, Երեւանում -9…-11: Ավելին՝ անցած գիշեր ունեցել ենք խիստ ցածր ջերմային ֆոն, օդի ջերմաստիճանը 4-5 աստիճանով գերազանցել է այս օրերին երբեւիցե գրանցված բացարձակ նվազագույն արժեքները: Աշոցքում, օրինակ, գրանցվել է -33, Գյումրիում, Ծաղկահովիտում -30, Հրազդանում, Ապարանում՝ -28, Տաշիրում, Գավառում, Ստեփանավանում՝ -25…-26, Արարատյան դաշտում՝ -19….-22, Երեւանի ցածրադիր գոտում՝ -20…-21, բարձրադիր գոտում՝ -16…-18 աստիճան ցուրտ»,- մանրամասնեց օդերեւութաբանը՝ ընդգծելով, որ առաջիկա գիշերը եւս սպասվում է օդի ջերմաստիճանի նվազում՝ 1-2 աստիճանով:
Այնուհետեւ, ըստ Սուրենյանի, եղանակը մինչեւ ամսի 24-ը կմնա անփոփոխ. այսինքն՝ կպահպանվի ցածր ջերմային ֆոն եւ առանց տեղումների եղանակ: «Առաջիկա օրերին ջերմաստիճանի ոչ իջեցում, ոչ բարձրացում չի կանխատեսվում: Միայն ամսի 21-ին որոշակի ամպամածության ավելացում է նկատվելու ցերեկային ժամերին: Այդ օրը հանրապետության առանձին հատվածներում աննշան ձյան տեղումներ կարող է լինեն»,- նկատեց Սուրենյանը:
Մանրամասներին կարող եք ծանոթանալ՝ «armtimes.com»-ի կայքում:
