«Կառավարության օպտիմալացման համատեքստում նման ընկերության լուծարումը տեղավորվում է եւ պետք չէ դա գնահատել որպես ՀՀ-Իրան երկաթուղու ծրագրից հրաժարում»,-Aravot.am-ի հետ զրույցում անդրադառնալով «Երկաթուղու շինարարության տնօրինություն» ՓԲԸ-ի գործունեության դադարեցմանը, ասաց իրանագետ Վարդան Ոսկանյանը:
Հիշեցնենք, որ Կառավարության այսօրվա նիստում որոշվել է լուծարել Տրանսպորտի, կապի և տեղեկատվական տեխնոլոգիաների նախարարության «Երկաթուղու շինարարության տնօրինություն» ՓԲԸ-ն, որը ստեղծվել էր Հայաստան-Իրան երկաթուղու ծրագիրը կյանքի կոչելու համար:
«Ինչպես այսօր ասել է Տրանսպորտի, կապի եւ տեղեկատվական տեխնոլոգիաների նախարարը, ՀՀ-ն իր օրակարգում է պահում երկաթուղու հարցը, եւ նախարարության կազմում կա համապատասխան կառույց, որը զբաղվելու է այդ խնդրով»,-նկատեց Վարդան Ոսկանյանը:
Նա ընդգծեց՝ իրանական կողմը բազմաթիվ հայտարարություններով փաստել է, որ երկաթուղու ծրագիրը ՀՀ-Իրան հարաբերությունների տնտեսական հատվածի օրակարգում է: «Բացի այդ, այն ունի քաղաքական կարեւոր նշանակություն՝ հաշվի առնելով ՀՀ-ի՝ շրջափակման մեջ գտնվելը: Դիտարկումը, թե մի կազմակերպության փակումը, որն, ըստ էության, կրկնօրինակում է համապատասխան նախարարության մեջ առկա այլ կառույցի գործունեությունը, նշանակում է երկաթուղու ծրագրից հրաժարում, միանշանակ՝ սխալ է եւ չափազանցված»,-եզրափակեց Վարդան Ոսկանյանը:
Կարդացեք նաև
Լուիզա ՍՈՒՔԻԱՍՅԱՆ
