Truth Social սոցիալական ցանցում գրառմամբ ԱՄՆ նախագահ Դոնալդ Թրամփը պաշտպանել է Ռուսաստանի դեմ նախատեսված լայնածավալ պատժամիջոցները չեղարկելու իր որոշումը՝ այն համարելով Մոսկվային բանակցությունների սեղանի շուրջ պահելու փորձ: Թրամփը նաև նշել է, թե Ուկրաինայի նախագահ Վոլոդիմիր Զելենսկին չի ցանկանում ավարտել պատերազմը:
«Ռուսաստանի վերաբերյալ իմ որոշումը շատ պարզ է։ Ես Ռուսաստանի և Ուկրաինայի միջև պատերազմի խաղաղ կարգավորման շուրջ բանակցությունների գործընթացում եմ և չեմ ցանկանում անել որևէ բան, որը հիմարաբար Ռուսաստանին կհեռացնի բանակցությունների սեղանից. մեծ առաջընթաց է գրանցվում, և դա ներառում է նաև պատանդների վերաբերյալ ընթացիկ բանակցությունները։ Այս պահին այդ փաստաթուղթը ստորագրելը կհանգեցնի դրան, իսկ ես կարող եմ այն ստորագրել ավելի ուշ կամ ցանկացած ժամանակ, երբ ցանկանամ։
Թերևս առավել կարևոր է այն, որ Ռուսաստանը շատ քիչ բան է անում, եթե ընդհանրապես ինչ-որ բան անում է, Իրանի Իսլամական Հանրապետությանը օգնելու համար՝ համեմատած այն բանի հետ, ինչ կարող էր անել, և ես ցանկանում եմ, որ այդպես էլ մնա, և այդպես էլ կլինի, եթե հիմար մարդիկ չխոչընդոտեն դրան։
Զելենսկին Ռուսաստանում դիզելային վառելիքի գործարաններն օգտագործում է որպես թիրախ՝ իմանալով, որ այդ հարձակումները լրջորեն վնասում են դիզելային վառելիքի համաշխարհային շուկաները, այդ թվում՝ Միացյալ Նահանգների շուկան։ Ֆերմերները, անասնապահները և բոլոր տեսակի բիզնեսները դրա հետևանքով մեծապես տուժում են, սակայն Ռուսաստանն, այնուամենայնիվ, ցածր գնով միլիոնավոր բարել դիզելային վառելիք է մատակարարում աշխարհին։
Կարդացեք նաև
Զելենսկիին դա չի հետաքրքրում, և անկեղծ ասած՝ հաշվի առնելով այն ամբողջ գումարը, որը Եվրոպան, ինչպես հայտնի է, նրան տալիս է, ինչպես նաև այն գումարը, որը նախկինում նրան տվել էր Ջո Բայդենը, նա չի ցանկանում վերջ տալ այս պատերազմին և, հավանաբար, երբեք էլ չի ցանկացել։ Զելենսկին երկու տարի առաջ կարող էր ավելի լավ պայմանավորվածություն ձեռք բերել, քան կարող է հիմա։
Նրա երկիրը ավերակների մեջ է, նրա տարածքի մեծ մասը կորցված է, նրա ծովերը չկան, նրա արական բնակչությունը նվազել է, վիրավորվել է և/կամ զոհվել։
ԵՍ ՑԱՆԿԱՆՈՒՄ ԵՄ, ՈՐ ԱՅՍ ՊԱՏԵՐԱԶՄՆ ԱՎԱՐՏՎԻ», – Truth Social-ում գրել է Թրամփը։
Թրամփը ստորագրել էր հրամանագիր, որով չեղարկում է նոր պատժամիջոցները, որոնք նախաձեռնել էր Ուկրաինայի աջակից, ամերիկացի հանգուցյալ սենատոր Լինդսի Գրեհեմը:
