«Կառավարման համակարգի փոփոխությունները պետք է գործեն ի նպաստ իրավական, ժողովրդավարական, ինքնիշխան պետության նոր փուլի կայացման, և ընկալելի ու ընդունելի լինեն ԼՂՀ միջազգային ճանաչման գործին աջակցող ուժերի և միջազգային կառույցների համար: Մեկ` միասնական հայրենիք ունենալու հայության տեսլականը իրագործելու նպատակով այսօր կարիք ունենք ստեղծելու իրավական, քաղաքական, տնտեսական նույնօրինակ դաշտ: Դա հայության ուժերը մեկտեղելու նոր հեռանկարներ է ուրվագծում: Սակայն, ներկայացված Սահմանադրության նախագիծը չի համապատասխանում այդ հրամայականներին: Մեզ անհրաժեշտ է երկիրն օժտել կառավարման այնպիսի համակարգով, որը համապատասխան լինի մեր երկրի ու ժողովրդի առջև ծառացած մարտահրավերների դիմակայմանը և քաղաքակիրթ աշխարհին ինտեգրմանը»,-Aravot.am-ի հետ զրույցում ասաց ԼՂՀ ԱԺ «Դաշնակցություն» խմբակցության ղեկավար Դավիթ Իշխանյանը:
Հիշեցնենք, այսօր ԼՂՀ-ի խորհրդարանի արտահերթ նիստում 20 «կողմ», 7 «դեմ», 1 «ձեռնպահ» ձայների հարաբերակցությամբ ընդունվել է Արցախի Հանրապետության Սահմանադրությունը հանրաքվեի դնելու մասին օրենքը: Նախագծին կողմ են քվեարկել ԼՂՀ ԱԺ «Հայրենիք» եւ «Ժողովրդավարություն» խմբակցությունները: Նախագծին դեմ են քվեարկել «Դաշնակցություն» եւ «Վերածնունդ» խմբակցությունները: «Շարժում-88» խմբակցության ղեկավար Էդուարդ Աղաբեկյանը հայտարարել է, որ չի կարող «կողմ» քվեարկել, եւ «ձեռնպահ» է քվեարկել:
ՀՅԴ-ն խորհրդարանական կառավարման համակարգի կողմնակից է, մինչդեռ ներկայացված նախագծով առաջարկվում է գերկենտրոնացված նախագահական համակարգ:
«Քննարկման ենթակա Սահմանադրության նախագծով նախատեսվող կառավարման համակարգը, որևէ երկրում գործող կառավարման համակարգի հետ աղերսներ չունի, որն ավելի է խորացնում թերահավատությունը տվյալ փաստաթղթի նկատմամբ»,- ասաց մեր զրուցակիցը`հավելելով, որ անկախ իր դիրքորոշումից և ունեցած վերաբերմունքից, «Դաշնակցություն» մասնակցել է Սահմանադրական բարեփոխումների բոլոր հանգրվաններին, մասնագիտական հանձնաժողովին ներկայացնելով իր առաջարկների գրավոր փաթեթը:
Կարդացեք նաև
Հանձնաժողովի կողմից ընդունվել են որոշակի առաջարկներ, սակայն առանցքային քաղաքական նշանակության առաջարկություններն այդպես էլ մնացին թղթի վրա: Ուստի, ըստ Դավիթ Իշխանյանի, ընկալելով ստեղծված իրավիճակը և գիտակցելով երկրի ապագայի հանդեպ իրենց պատասխանատվությունը, իրենք նախագծին «դեմ» են քվեարկել:
Նելլի ԳՐԻԳՈՐՅԱՆ
