1990թ. Բաքվում հունվարի 13-19-ը կազմակերպված հայերի ջարդերի առնչությամբ նոր փաստեր են ի հայտ եկել: Մասնավորապես՝ հայերին գերի են պահել, կտտանքների ենթարկել, իսկ լաստանավերով փրկվել փորձողներին՝ նետել ծովը: Այս մասին այսօր «Նովոստի Արմենիա» մամուլի կենտրոնում լրագրողներին հայտնեց «Սովորական ցեղասպանություն» նախագծի ղեկավար Մարինա Գրիգորյանը:
Նա տեղեկացրեց, որ նախագծի շրջանակում հավաքագրվել են Բաքվի ջարդերից փրկվածների, ականատեսների վկայությունները. «Մեկնել ենք ԱՄՆ, որտեղ ջարդերից հետո 60.000 հայ է հաստատվել, եւ 150 հոգու տեսագրել: Արդյունքում ունենք եռալեզու ֆիլմ՝ «Մեկ դար տեւող ցեղասպանություն. Բաքվի սեւ հունվարը»: Նոր փաստեր են ի հայտ եկել: Փրկվածը պատմել է, որ հունվարից հետո հայերը որպես պատանդ են պահվել: Մի կին, որն ապրում է ԱՄՆ-ում, մեկ տարի պահվել է որպես պատանդ, նրա հետ միասին՝ ռուս զինվորականներ: Նա հրաշքով է փրկվել, եւ յոթ տարի է՝ անկողնում պառկած է»:
Կարդացեք նաև
Մարինա Գրիգորյանը նշեց՝ պարզվել է նաեւ, որ դեպի Թուրքմենիա ուղեւորվող Լաստանավից հայերին նետել են Կասպից ծովը, սակայն պարզ չէ, թե քանիսն են զոհ գնացել այդ վայրագությանը: Բացահայտվել է նաեւ, որ Բաքվում հայերի դեմ հարձակումների փաստով որոշ քրեական գործեր են հարուցվել: Թեեւ այդ մասին պահպանվել են փաստաթղթեր, բայց գործերը կարճվել են:
Մարինա Գրիգորյանը ներկայացրեց նաեւ նոր գիրք, որը ստեղծվել է փրկված հայերի հետ հարցազրույցների հիման վրա եւ ամփոփում է վերջիններիս վկայությունները: Այժմ պատրաստվում է գրքի երկրորդ հատորը:
Այլ մանրամասները՝ տեսանյութում
Լուիզա ՍՈՒՔԻԱՍՅԱՆ
