«Չեմ կարող բացառել, որ Հովիկ Աբրահամյանը կսկսի Սերժ Սարգսյանի դեմ աշխատել, որովհետեւ ՀՀ-ում կառավարման համակարգը ոչ թե գաղափարական սկզբունքների շուրջ է կառուցված, այլ ռեսուրսների բաշխման շուրջ է: Իսկ քանի որ ռեսուրսները քչանում են Հայաստանում, բնական հակասություն է առաջանում անձնական շահերի տեսանկյունից ու համակարգից դուրս է գալիս այս կամ այն անձը»,- «Ժառանգություն» կուսակցության փոխնախագահ Արմեն Մարտիրոսյանը մեզ հետ զրույցում այսպես մեկնաբանեց Հովիկ Աբրահամյանի՝ ՀՀԿ-ից դուրս գալու հայտարարությունը:
Ըստ նրա, միայն այն, որ Հովիկ Աբրահամյանը ՀՀԿ-ում չի լինի, դա մեծ հարված է Սերժ Սարգսյանի եւ իշխանության համար. «Հովիկ Աբրահամյանն այն անձն է, որը բոլոր համապետական ընտրություններին շտաբի պետն է եղել եւ որեւէ մեկը չկա Հայաստանում, որ իրենից լավ տիրապետի ընտրակեղծարարության մեխանիզմին, թե որտեղ ով պետք է աշխատի, ինչ թիմերով: Ակնհայտ է, որ դա կորուստ է իշխանության համար: Այնպես չէ, որ ինքը միակն է եւ իշխանությունն առանց Հովիկ Աբրահամյանի միայն արդար, ազատ եւ թափանցիկ ընտրություն է անցկացնելու, բայց իր վարպետությունը, համոզված եմ, որեւէ մեկը չի ունեցել»:
Մենք ճշտեցինք՝ այսինքն, կարծում եք, որ սա Սերժ Սարգսյանի սցենարով չէ՞ Հովիկ Աբրահամյանին անջատելու եւ առանձին խաղ տանելու այս ընտրություններում՝ Արմեն Մարտիրոսյանը պատասխանեց. «Չեմ կարող բացառել, բայց հաշվի առնելով, որ ռեսուրսների խնդիր գոյություն ունի երկրում, այդ հակասությունը այսպես թե այնպես պետք է արտահայտվի: Ակնհայտ էր, որ Հովիկ Աբրահամյանին եռյակի դեմ «օգտագործելուց» հետո, երբ արդեն եռյակ չկար, մինչեւ ընտրություններ նա պետք է դուրս գար»:
Կարդացեք նաև
Ըստ պարոն Մարտիրոսյանի, պարզ է, որ Հովիկ Աբրահամյանը ընդդիմություն չէ, բայց նաեւ ակնհայտ է, որ իշխանություն էլ չէ, ոչ իշխանական է: Բայց մի հարցում Արմեն Մարտիրոսյանը խիստ դժվարանում է պատասխանել՝ ով է լինելու Հովիկ Աբրահամյանի ընտրողը. «Որ գտնեք՝ ինձ էլ ասեք: Չեմ պատկերացնում ով կգնա նրա հետեւից: Նախկին պաշտոնյաներ կան, որոնց պարագայում կարող ես ասել, թե ով կգնա իր հետեւից, իսկ Հովիկ Աբրահամյանի պարագայում դժվարանում եմ ասել»:
Հռիփսիմե ՋԵԲԵՋՅԱՆ
