«Ժառանգություն» խմբակցության պատգամավոր Թեւան Պողոսյանն օրերս հայտարարեց, որ չի ուզում առաջադրվել: «Առավոտը» հետաքրքրվեց՝ ի՞նչն է պատճառը: Նա պատասխանեց. «Եթե ես ծրագիրը չգիտեմ, մարդիկ ինչ են առաջարկում, ոնց են պատկերացնում… Ծրագիրը կլինի՝ կտեսնենք»:
Հարցին՝ մինչ օրս ձեւավորված դաշինքներից Ձեզ հոգեհարազատ որեւէ բան չե՞ք տեսնում, նա պատասխանեց. «Կան տեղեր, որտեղ դու մարդկանց գիտես, գիտես իրենց հետ աշխատանքը, անցել ես իրենց հետ լավ ու վատ օրեր: Տեղեր էլ կան, որ տեսնում ես՝ մարդիկ են հավաքվել, 5.5 տարի է՝ ոչ մի հատ ելույթ եմ լսել, ոչ մասնակցել են հանձնաժողովների աշխատանքներին»: Նա ասաց, որ խորհրդարանական համակարգում պատգամավորը պետք է «հին ձեւերով» չաշխատի: Մեր հարցին՝ ՀՀԿ կարո՞ղ է մտնեք, Թեւան Պողոսյանը հարցրեց. «Ե՞ս, ՀՀԿ-ո՞ւմ: Վստահ եմ, որ առաջարկ լինի՝ միանգամից եմ մերժելու, բայց նույնիսկ մտքովս չէր անցնում ամենավատ տարբերակով, որ կարող է այդտեղ ինձ պատկերացնեմ:
Միգուցե մի 50-60 տարի հետո, եթե ՀՀԿ-ն այսպես ինքնամաքրման գնա, կարող է հետաքրքիր լինի, բայց 50-60 տարի ժամանակ պիտի անցնի»: Թեւան Պողոսյանն ասաց, որ «Ելք» դաշինքում մարդիկ կան, ում հետ ինքը շփվում է, աշխատել է, գիտի՝ ինչի են ունակ. «Բայց, միեւնույն է, ինձ ամենահետաքրքիրը ծրագիրն է, որ հասկանանք՝ ինչով ենք մենք զբաղվելու: Ես մեկ անգամ վառվել եմ ծրագրի գաղափարի վրա, որ մի բան ասում են, հետո ուրիշ բան են անում, դրա համար չեմ ուզում կրկնվեմ»:
Կարդացեք նաև
ՀՌԻՓՍԻՄԵ ՋԵԲԵՋՅԱՆ
«Առավոտ»
01,02.2017