«Մարտի 1-ի դեպքերը պետական մակարդակով կազմակերպված գործողություններ են: Քանի դեռ ՀՀ-ում իշխանափոխություն տեղի չի ունեցել, հանցագործները դժվար թե հայտնաբերվեն»,-այս մասին «Ազատություն» ռ/կ-ի ուղիղ եթերում ասաց «Ազատ դեմոկրատներ» կուսակցության պատգամավորի թեկնածու, քաղաքագետ Ստյոպա Սաֆարյանը:
Նշենք, որ «Ազատ դեմոկրատներ»-ի ներկայացուցիչներն այսօր այցելել են Մյասնիկյանի արձանի հարակից տարածք՝ հարգելու 2008թ․ Մարտի 1-ի զոհերի հիշատակը։
Սաֆարյանը նկատեց, որ «Մարտի 1»-ի հետ առնչություն ունեցող նախկին պաշտոնյաներն այսօր մասնակցում են առաջիկա ԱԺ ընտրություններին՝ դրանով իսկ պահելով սեփական քաղաքական եւ տնտեսական ազդեցությունը, միաժամանակ՝ փակելով «Մարտի 1»-ի հանցագործներին պատասխանատվության ենթարկելու հեռանկարը:
Կարդացեք նաև
«Սերժ Սարգսյանը կրում է պատասխանատվություն: «Մարտի 1»-ի դեպքերը կապված են եղել իր ընտրությունների հետ: Նա պարտավոր էր ամեն ինչ անել՝ հանցագործությունը կատարողներին պատասխանատվության ենթարկելու համար: Նա է լուծարել «Մարտի 1»-ի փաստահավաք խումբը՝ նրա համար, որ խումբը խոսում էր բանակի ներգրավվածության, հանցավոր ուժի կիրառման մասին: Ներկայիս իշխանությունը կրում է այս ամենի պատասխանատվությունը»,-ասաց Ստյոպա Սաֆարյանը:
Ըստ նրա՝ «Մարտի 1»-ի՝ բացահայտված չլինելու հետեւանքներն ակնհայտ են. դեպքերն ազդել են ՀՀ-ի միջազգային հարաբերությունների վրա, ավելացրել ՌԴ-ի ազդեցությունը ՀՀ-ի վրա:
Լուիզա ՍՈՒՔԻԱՍՅԱՆ
