Հանրապետական կուսակցության խոսնակ Էդուարդ Շարմազանովը վստահ է, որ ապրիլի 2-ին ընտրված ԱԺ-ն հետաքրքիր եւ ինտելեկտուալ է. ուր կարող է լինել սուր եւ գաղափարական պայքար: Լրատվամիջոցներն ու փորձագետները վստահ են, որ վերջին 20 տարում Հայաստանի խորհրդարանի հավաքական ինտելեկտը անգամներով նվազել է, ու նույնչափ աճել մականունավոր եւ գրագիտությամբ չփայլող պատգամավորների քանակը:
Այս հարթությունում առաջինն ու չգերազանցված ռեկորդակիրն, անկասկած, ՀՀԿ-ական Գալուստ Սահակյանն է՝ իր «կառուցողական զենքեր», «ցմահ մահապատիժ», «գողությունը գողանալը չէ», «երեխաները պարտավոր են մեծանալ», «մարդկային փոխհարաբերություններում բոլորը պիտի հարաբերվեն» եւ այլ «գլուխգործոցներով»:
Ապրիլի 2-ին ընտրված ԱԺ-ում «Ծառուկյան» դաշինքը ունենալու է 31 պատգամավոր, որոնցից մեկը Լուիզա Սարգսյանն է՝ Հայաստանի ազգային պոլիտեխնիկական համալսարանի ռուսաց լեզվի ամբիոնի ասիստենտ: Պատգամավորի մանդատը ստանալիս Լուիզա Սարգսյանը հարցազրույց է տվել հեռուստաընկերություններից մեկին, եւ ակնհայտ է, որ 40-ամյա Լուիզա Սարգսյանը 69-ամյա Գալուստ Սահակյանին լուրջ մրցակից է: Նշված հարցազրույցում Լուիզա Սարգսյանն ասում է. «Մենք հետամուտ ենք լինելու նրան, որ մեր գաղափարները, մեր քաղաքականությունը, որը մենք որոշել ենք վարենք, կարողանանք հասցնենք իր գագաթնակետին, եւ վստահ եմ, որ պետք է ունենանք հաջողություններ»:
Սա մտքում ռուսերեն, բարձրաձայն հայերեն խոսողի խոսք է: Սա հայերեն չի, ինչպես հայերեն չեն Գալուստ Սահակյանի խոսքերը: Իսկ վարչական իրավախախտումների վերաբերյալ օրենսգրքի 189.6 հոդվածի համաձայն՝ պաշտոնատար անձանց հայերենին չտիրապետելն առաջացնում է տուգանքի նշանակում` սահմանված նվազագույն աշխատավարձի հարյուրապատիկից մինչեւ հարյուրհիսնապատիկի չափով:
Մականունավոր եւ գրագիտությամբ չփայլող ոչ մի պաշտոնյա մինչ օրս չի տուգանվել հայերենին չտիրապետելու համար: Չի տուգանվի եւ Լուիզա Սարգսյանը: Փոխարենը, բացի Գալուստ Սահակյանից, առնվազն եւս մեկ պատգամավոր կդառնա լրատվամիջոցների «պարապ վախտի խաղալիքը»:
ՆԵԼԼԻ ԳՐԻԳՈՐՅԱՆ
«Առավոտ»
17.05.2017
