ԱԺ-ում այսօր շարունակում են ելույթներ ունենալ հանձնաժողովների նախագահների թեկնածու-պատգամավորները: Պաշտպանության եւ անվտանգության հանձնաժողովի նախագահի թեկնածու Կորյուն Նահապետյանը, որը նախորդ նստաշրջանում ղեկավարում էր այդ հանձնաժողովը, վստահեցրեց, որ իր ընտրվելու դեպքում շարունակելու է ջանասիրաբար աշխատել:
«Հինգ տարում կարողացել ենք նպաստել պաշտպանության բնագավառում թափանցիկության բարձրացմանը, իրավական հիմքեր ձեւավորել ռազմարդյունաբերության զարգացման համար»,-հայտարարեց Կորյուն Նահապետյանը:
Ինչ վերաբերում է հանձնաժողովի առաջիկա անելիքներին, նրա խոսքով. «Առաջնահերթ կարեւորություն է ունենալու Արցախի եւ ՀՀ-ի անվտանգության ապահովումը»:
«ԵԼՔ» դաշինքի պատգամավոր Մանե Թանդիլյանը հարց ուղղեց Նահապետյանին. «Կա խնդիր, որ ընտանիքներն իրենք են ապահովում զինվորների առաջին անհրաժեշտության պարագաները: Ի՞նչ լուծումներ եք պատրաստվում առաջարկել»: Կորյուն Նահապետյանը պատասխանեց, որ պետական բյուջեով նախատեսված են միջոցներ՝ ծառայության ապահովման համար. «Իհարկե, հանձնաժողովը հետեւողական է լինելու այդ հարցում»:
«Պատեհ չէ, որ հիգիենայի պարագաները մատակարարում են ծնողները»,-շարունակեց Մանե Թանդիլյանը:
«Որոշ դեպքերում մոտեցումը չափազանցված է: Ամեն ծնող ցանկանում է իր զավակի համար պայմաններ ստեղծել: Ցանկալի կլինի, որ որակական փոփոխություններ կատարենք»,-արձագանքեց Կորյուն Նահապետյանը:
Լուիզա ՍՈՒՔԻԱՍՅԱՆ
