Մայիսի 29-ին «Պոստ Սկրիպտում» մամուլի ակումբի հյուրն էր «Անտարես» հրատարակչության տնօրեն Արմեն Մարտիրոսյանը: Նա խոսեց հայոց լեզվի պահպանման խնդրից` Հայաստանում և Թուրքիայում:
Արմեն Մարտիրոսյանն ասաց, որ 60 լեզվից թարգմանիչներ չունենք, իսկ «Անտարեսը» 18 լեզվից է թարգմանություններ անում: Առաջիկա 1-1,5 տարվա ընթացքում հայ ընթերցողին բնագրից թարգմանաբար հասու կլինի նաեւ ճապոնական գրականությունը:
Նա ցավով փաստեց, որ Հայաստանում տարեկան միջինը 48 գեղարվեստական գիրք է վաճառվում, ինչը խայտառակություն որակեց: Ինչ վերաբերում է գիտական գրականությանը, ընդամենը 1-2 գիրք է վաճառվում:
«Ճահճացած Սովետական Միությունում մարդիկ կարդում էին, Հայաստանում չեն կարդում…Փոքր ժողովուրդ ունեցող երկրներում` Էստոնիայում, Սլովենիայում, անգամ չճանաչված Աբխազիայում եւ մեր հարեւան Վրաստանում հրատարակիչները հնարավորություն ունեն ուղիղ գրախանութների հետ շատ աշխատել, մեզ մոտ նման բան չկա: Հայաստանի 700-800 համայնքային գրադարանները տասնյակ տարիներով գրքեր չեն ստանում»,-փաստեց «Անտարեսի» տնօրենը:
Նրա հավաստմամբ, տարին 2000 անուն գիրք է հրատարակվում, որից մի 10 գիրք է որոշ գրադարաններ գնում, իսկ 1400 դպրոցական գրադարանները միայն դասագրքեր են ստանում:
Մանրամասները` տեսանյութում:
Գոհար ՀԱԿՈԲՅԱՆ
