«Ծառուկյան» խմբակցությունը չի պատրաստվում «կողմ» քվեարկել «Պետական գույքի մասնավորեցման 2017-2020 թվականների ծրագրի» նախագծին այն տեսքով, որ ներկայացված է:
Հիշեցնենք, խոսքը 24 կազմակերպությունների մասնավորեցման մասին է, որոնց թվում են «Հայփոստը», «Հայֆիլմը», «Հրազդան» մարզադաշտը, «Ֆանարջյան» ուռուցքաբանության կենտրոնը եւ այլն: Նախագիծն այսօր քննարկվում էր ԱԺ տնտեսական հարցերի հանձնաժողովում:
«Կան այնպիսի հանրային հնչեղությամբ ընկերություններ, որոնք մենք պիտի մասնավորեցման ստանդարտ ճանապարհով չտանենք: Դա տանելու է մեզ փակուղի, ու մենք ժողովրդին չենք կարողանալու բացատրենք, թե ինչո՞ւ ենք գնացել դրան: Մենք պիտի համոզված լինենք, որ գնալու է էֆեկտիվ օտարման գործընթաց, դա պիտի լինի քաղաքական ուժերի կոնսենսուսով: Բերեք, այս հնչեղություն ունեցող ընկերությունները տանենք կոնսենսուսով»,- առաջարկեց Միքայել Մելքումյանը:
Հանձնաժողովի ՀՀԿ-ական նախագահ Խոսրով Հարությունյանն էլ համամիտ է, ներդրողի հարց պիտի հստակ լինի նախքան մասնավորեցումը. «Անշուշտ, քաղաքական կոնսենսուսը մի բանում պիտի լինի՝ սեփականաշնորհե՞լ, թե` ոչ: Մնացած բոլոր հարցերում պարտադիր չէ ունենալ կոնսենսուս»:
Միքայել Մելքումյանը հստակեցրեց`իր ասածը քաղաքական կոնսենսուսն էր. «Առողջապահության նախարարն էլ այստեղ բացթողում արեց. ասում է՝ չգիտենք՝ ինվեստր կա՞, թե` չէ: Ա~յ քեզ բան, չգիտես՝ ինվեստր կա՞, թե՞ չէ. միգուցե որևէ ներդրում չի լինի ու որպեսզի ապագա ռիսկերից խուսափենք, պիտի նախապես անենք»:
Հանձնաժողովի նախագահ Խոսրով Հարությունյանն առաջարկեց ավելի ուշ հավաքվել, քննարկել վիճելի հարցերը: Կառավարության ներկայացուցիչ Արման Սահակյանն էլ արձագանքեց. «Գիշերվա մեկին էլ լինի, պատրաստ եմ գալ»:
Հարցի վերջնական քննարկումն ու քվեարկությունը կլինի վաղը, արտահերթ նիստից առաջ:
Նելլի ԳՐԻԳՈՐՅԱՆ
