«Այդպիսի աշխատանքներ չեն վարվել, չեն վարվում և մոտակա ժամանակներում չեն պատրաստվում վարվել», հունիսի 7-ին «Սպուտնիկ Արմենիա»-ի մամուլի սրահում լրագրողների հետ հանդիպման ընթացքում, անդրադառնալով Եվրասիական տնտեսական միությունում միասնական արժույթի հաստատմանը, ասաց Եվրասիական տնտեսական հանձնաժողովի ֆինանսական քաղաքականության դեպարտամենտի տնօրեն Տիգրան Դավթյանը:
Նա բացատրեց. «Դա սուվերենության հարց է: Միասնական արժույթի գաղափարախոսությունը բերելու է երկրների միասնական դրամավարկային քաղաքականության, ինչպես այսօր Եվրամիությունում: Այսինքն՝ կա Եվրոբանկ, որը վարում է դրամավարկային քաղաքականություն, ունեն եվրո, մենք դրան այսօր պատրաստ չենք, երբ կլինենք պատրաստ, չեմ կարող ասել: Երբ որ խոսում ենք, խոսում ենք այն մասին, որ 2025 թվականին պետք է ունենանք միասնական ֆինանսական շուկաներ, այսինքն՝ հարմոնիզացված»:
Տիգրան Դավթյանի կարծիքով՝ դժվար թե 2025 թվականին միասնական արժույթի անցնելու խոսակցությունները շարունակվեն. «Ամեն երկիր դողում է իր սուվերենության վրա: Ուրիշ խնդիր է, որ մենք աշխատանքներ ենք տանում ստեղծելու հաշվարկային միավոր: Այսինքն՝ մենք աշխատանքներ ենք տանում, որպեսզի հաշվարկները վարվեն կա՛մ ազգային արժույթներով, կա՛մ ստեղծվի որոշակի հաշվարկային միավոր»:
Ամի ՉԻՉԱԿՅԱՆ
