Այսօր ԱԺ-ում քվեարկության դրվեց Կոռուպցիայի կանխարգելման հանձնաժողովի մասին Արփինե Հովհաննիսյանի եւ կառավարության հեղինակած նախագիծը:
Մինչ քվեարկությունը Արփինե Հովհաննիսյանը հայտարարեց, որ քննարկումներ են ունեցել եւ խորհրդարանական ընդդիմության, ՀՅԴ-ի առաջարկը ընդունել են՝ մրցութային հանձնաժողովի կազմում կլինեն նաեւ ընդդիմության ներկայացուցիչներ, նրանք կոնսենսուսով կարող են թեկնածու առաջադրել:
«Ելք» խմբակցության ղեկավար Նիկոլ Փաշինյանն ասաց. «Նախագիծը մեր պատկերացրածը չէ, բայց սա քայլ առաջ է՝ դեպի մեր պատկերացումներին համապատասխանող հակակոռուպցիոն մարմին ստեղծելու համար»:
«Ծառուկյան» դաշինքի պատգամավոր, ԱԺ փոխխոսնակ Միքայել Մելքումյանն էլ ասաց, որ երեկ բանակցել են եւ եկել են ընդհանուր հայտարարի, որ մրցութային հանձնաժողովում խորհրդարանական ընդդիմությունը անդամներ առաջադրի, ուստի իրենք կողմ են լինելու:
ԱԺ-ն միաձայն 87 կողմով ընդունեց նախագիծը՝ առաջին ընթերցմամբ:
Հռիփսիմե ՋԵԲԵՋՅԱՆ
