ԱԺ ՀՀԿ խմբակցության պատգամավոր, ֆինանսատնտեսական հանձնաժողովի նախագահ Խոսրով Հարությունյանը կարծում է, որ կառավարության ներկայացրած նոր՝ հնգամյա ծրագիրը միտված է խթանելու փոքր եւ միջին ձեռնարկատիրությունը, նպաստելու աշխատատեղերի ստեղծմանը, ձեւավորելու մրցունակ տնտեսություն: «Սա նշանակում է՝ ձեւավորել այնպիսի հագեցած արտադրական հզորություններ, որոնք արտաքին շուկաներ դուրս կբերեն մրցունակ արտադրանք: Սա կառավարության գլխավոր նպատակն է»,-«Փաստարկ» մամուլի ակումբում այսօր հայտարարեց նա:
Հարությունյանի խոսքով՝ կառավարության ծրագիրը, ի տարբերություն նախորդների, աշխատելու է կազդուրել ՀՀ տնտեսական օրգանիզմը. «Ունենք օտարերկրյա ներդրումներ ներգրավելու խնդիր: Եվրոպայում արտադրող ներդրողը պետք է համոզվի, որ ՀՀ-ում նույնը կարող է արտադրել էժան եւ որակյալ: Այդ նպատակով Կառավարությունը մտադիր է առաջիկայում ձեւավորել ՀՀ որակի հավաստագրման ինստիտուտ. այսինքն, ապրանքը պետք է համապատասխանի եվրոպական չափանիշներին: Ամեն անգամ հնարավոր չէ ապրանքը տանել Եվրոպա՝ ստանդարտիզացիայի»:
Մյուս խնդիրը, որն աշխատելու է կարգավորել կառավարությունը, արտահանումն է: Խոսրով Հարությունյանը նշեց, որ հաճախ հայ արտահանողների գործընկերները տեւական ժամանակ չեն վճարում վերջիններիս, եւ արտահանողի միջոցներն են փոշիացվում: «Կառավարությունը ստեղծելու է արտահանման ապահովագրական գործակալություն: Այսինքն, գործակալությունն ուսումնասիրելու է արտահանողի գործընկերոջ կարողությունները եւ խորհուրդ տալու՝ արժի՞ նրա հետ աշխատել, թե ոչ: Բացի այդ, գործակալությունը ստանձնում է ռիսկերը՝ վճարում, եթե գործընկերը չի վճարել: Արտադրողն էլ սկսում է աշխատել գործընկերոջ հետ եւ ստանալ կորուստները»,-նշեց Խոսրով Հարությունյանը:
Նա նաեւ ընդգծեց, որ կառավարության ծրագրով նախատեսվում է ՀՆԱ-ի աճ՝ ամեն տարում հինգ տոկոսի չափով:
Մանրամասն՝ տեսանյութում:
Լուիզա ՍՈՒՔԻԱՍՅԱՆ
