Կենտրոն և Նորք-Մարաշ վարչական շրջանների ընդհանուր իրավասության դատարանի նախագահող դատավոր Մնացական Մարտիրոսյանը քիչ առաջ հրապարակեց «Սասնա ծռեր» խմբի անդամ Արայիկ Խանդոյանի եղբոր՝ Արարատ Խանդոյանի դատավճիռը:
Ըստ դատավճռի՝ Արարատ Խանդոյանը մեղավոր ճանաչվեց իրեն առաջադրված մեղադրանքում եւ դատապարտվեց 3 տարի 6 ամիս ազատազրկման:
Արարատ Խանդոյանը վճռի հրապարակումից հետո ծափահարեց ու հեռացավ նիստերի դահլիճից, հեռացան նաեւ նրա հարազատները:
Խանդոյանի պաշտպան՝ փաստաբան Արա Ղարագյոզյանը նիստից հետո Aravot.am-ին ասաց. «Ապօրինի դատական ակտ է, իհարկե, սպասելի էր, որովհետեւ այս դատավորից արդարադատություն սպասելը աբսուրդ է: Մենք դիմելու ենք մարդու իրավունքների եվրոպական դատարան, եւ Խանդոյանի՝ կալանքի վերաբերյալ մեր արդեն ուղարկած բողոքներին կմիանա եւս մեկ բողոք: Շուտով եվրոպական դատարանը, համոզված եմ, որ օրինական որոշում կկայացնի«:
Հիշեցնենք, որ Արարատ Խանդոյանին մեղադրանք էր առաջադրվել ՀՀ քրեական օրենսգրքի 225-րդ հոդվածով՝ զանգվածային անկարգություններին մասնակցելը, որում և ճանաչվեց մեղավոր:
Արփինե ՍԻՄՈՆՅԱՆ
