Ժիրայր Սեֆիլյանի եւ մյուսների գործով դատական նիստն այսօր ընթանում է առանց փաստաբաններ Տիգրան Եգորյանի եւ Տիգրան Հայրապետյանի, որոնք դատարանին տեղեկացրել են հարգելի պատճառով բացակայելու մասին: Եգորյանը մասնավորապես կրկին շեշտել է, որ անհրաժեշտ է վերականգնել իր պաշտպանյալ Ներսես Գեւորգյանի մասնակցությունը նիստին: Փաստաբանների հարցը քննարկելու համար դատավոր Տաթեւիկ Գրիգորյանը ընդմիջեց նիստը:
Նշենք, որ մյուս փաստաբանները, նաեւ՝ ամբաստանյալներից Ժիրայր Սեֆիլյանը, Գեւորգ Սաֆարյանը եւ Ներսես Պողոսյանը նիստին ներկա չէին՝ սանկցիաների ենթարկված լինելու պատճառով: Փաստաբաններից ներկա էին միայն Արայիկ Պապիկյանը եւ Նինա Կարապետյանցը: Վերջինս էլ մինչեւ դատավորի կողմից նիստն ընդմիջելը հեռացավ նիստերի դահլիճից, քանի որ դատավորն ընդհատում էր նրան՝ թույլ չտալով հայտարարություն անել իր պաշտպանյալ Ներսես Պողոսյանի վերաբերյալ:
Գործում նոր մեղադրող դատախազ ներգրավվեց: Երբ դատավորը հարցրեց կողմերի կարծիքը, Արայիկ Պապիկյանն ասաց. «Մենք չենք կարող մեր պաշտպանյալների հետ քննարկել նոր մեղադրողի ներգրավման հարցը, քանի որ պաշտպանյալները հեռացված են նիստերի դահլիճից: Երբ մեզ կշտամբում եք, հարգելի դատավոր, ինչը չի բխում օրենքից, հաշվի առեք, որ դատարանն է նրանց զրկել այդ ներկա գտնվելու իրավունքից»:
Դատավորն էլ չհամաձայնեց՝ ասելով, որ ամբաստանյալներն իրենք են դիտավորյալ գործողություններով իրենց զրկել նիստերին մասնակցելու իրավունքից:
Մանրամասն՝ տեսանյութում:
Լուիզա ՍՈՒՔԻԱՍՅԱՆ
