Վրաստանի մարդու իրավունքների պաշտպան Ուչա Նանուաշվիլին համոզված է, որ ադրբեջանցի հետաքննող լրագրող Աֆղան Մուխթարլիի՝ Վրաստանում առևանգվելու հետաքննությունը անարդյունավետ կլինի, քանի որ Ներքին գործերի նախարարության աշխատակիցները համաձայնեցված չեն գործում: Այս մասին հայտնում է meydan.tv-ն:
Օմբուդսմենը դիմել է Վրաստանի գլխավոր դատախազի գրասենյակին՝ խնդրելով քայլեր ձեռնարկել այդ ուղղությամբ:
«Հանրությանը համոզելու համար, որ արդար հետաքննություն կընթանա, պետք է բացառել հիերարխիկ կամ ինստիտուցիոնալ կապերը քննիչների և հետաքննող մարմինների միջև»,- ասել է մարդու իրավունքների պաշտպանը:
Նշենք, որ Վրաստանի ՆԳՆ և Ազգային անվտանգության ծառայության ներկայացուցիչները հերքում են Մուխթարլիի առևանգման փաստը:
Վրաստանի վարչապետ Գեորգի Կվիրիկաշվիլին հայտարարել է, որ անընդունելի է համարում պետանվտանգության ծառայությունները վարկաբեկելու փորձերը: Նա նաև նշել է, որ թույլ չի տա, որպեսզի նման փորձերը վնաս հասցնեն երկրի հեղինակությանը և նրա ժողովրդավարական արժեքներին:
Պատրաստեց՝ Վիկտորյա ԱՆԴՐԵԱՍՅԱՆԸ
