Ոստիկանության ՊՊԾ գունդը գրաված «Սասնա ծռեր» զինված խմբի անդամներից 18-ի գործով դատական նիստում այսօր դատավոր Արտուշ Գաբրիելյանը որոշեց փաստաբան Լուսինե Սահակյանին սանկցիայի ենթարկել՝ համապատասխան գրությամբ դիմելով ՀՀ փաստաբանների պալատին:
Ապա դատավորը հայտարարեց, որ ամբաստանյալ Սերգեյ Կյուրեղյանը դատարանի համապատասխան խուց տեղափոխվելիս ստացել է գլխի վնասվածք: Ուղեկցող ոստիկանները զեկուցել են, որ նա գլուխը պատահաբար հարվածել է մուտքի երկաթյա ամրանին:
Սերգեյ Կյուրեղյանը, որը սանկցիայի է ենթարկված եւ հեռացված նիստերի դահլիճից, մի քանի րոպեով բերվեց դահլիճ: Դատավորը ճշտեց, թե ինչպես է եղել միջադեպը: Ամբաստանյալը հաստատեց, որ գլուխը պատահաբար է հարվածել:
Այնուամենայնիվ, դատավորը տեղեկացրեց, որ դեպքի առթիվ քննություն է կատարվում:
Ամբաստանյալների պաշտպաններից Լուսինե Սահակյանը խնդրեց դատավորին՝ պարզաբանել, թե այդ ո՞ր օրենքով ինքը չի կարող հիմա միջնորդություն ներկայացնել:
Դատավորին չհաջողվեց ընդհատել Լուսինե Սահակյանին եւ նա կրկին ընդմիջեց նիստը՝ փաստաբանի հանդեպ կրկին սանկցիա կիրառելու հարցը քննարկելու նպատակով:
Լուիզա ՍՈՒՔԻԱՍՅԱՆ
