«Յանդեքս» և Uber ընկերությունները համաձայնության են եկել միավորել Ռուսաստանում, Հայաստանում, Ադրբեջանում, Բելառուսում, Վրաստանում և Ղազախստանում տաքսիների առցանց պատվերների բիզնեսը: Այս մասին ասվում է ընկերությունների տարածած համատեղ հաղորդագրության մեջ, գրում է «ՌԻԱ Նովոստին»:
Համատեղ ընկերություն ստեղծելու գործարքին հավանություն են տվել 2 ընկերությունների տնօրենների խորհուրդները: Այժմ այն պետք է համաձայնեցնեն կարգավորող մարմինները, նախատեսվում է, որ գործարքն ավարտին կհասնի տարվա 4-րդ քառորդում:
Նոր ընկերությունում Uber-ը կներդնի 225 մլն դոլար, իսկ «Յանդեքսը»՝ 100 մլն: Նոր ընկերությունը կողմերը գնահատում են 3725 մլրդ դոլար: Գործարքի ավարտից հետո ընկերության 59.3 տոկոսը կպատկանի «Յանդեքսին», 36.6 տոկոսը՝ Uber-ին, իսկ 4.1 տոկոսը՝ աշխատակիցներին: Նոր ընկերությունը կգլխավորի «Յանդեքս-Տաքսի»-ի գլխավոր տնօրեն Տիգրան Խուդավերդյանը: Նոր ընկերությանը կանցնի նաև UberEATS ծառայությունը:
Ընդ որում, փոխադրման երկու ծառայությունների հավելվածներն էլ՝ և՛ «Յանդեքս-Տաքսին», և՛ Uber-ը, կշարունակեն հասանելի լինել օգտատերերին: «Միաժամանակ, տաքսոպարկերը և վարորդներն անցում կկատարեն միասնական տեխնոլոգիական հարթակի, ինչը հնարավորություն կտա ավելացնել պատվերներ իրականացնելու համար հասանելի մեքենաների թիվը, կրճատել ժամանակը, բարձրացնել հուսալիությունը և ընդհանուր առմամբ ծառայության հասանելիությունը»,- ասվում է հաղորդագրության մեջ:
Պատրաստեց՝ Վիկտորյա ԱՆԴՐԵԱՍՅԱՆԸ
