Արցախի Հանրապետության գյուղատնտեսության նախարարի տեղակալ Գևորգ Վերանյանը Aravot.am-ի հետ զրույցում ասաց, որ ընթացիկ տարում մոտ 200 հա-ի այգիների և ծխախոտի դաշտերի համար նախատեսված կաթիլային համակարգի տեղադրման հայտեր արդեն բավարարվել են:
«Կաթիլային ոռոգման համակարգի ներդրումը խրախուսվում է պետության կողմից, և անհատույց տրամադրվում է համակարգի տեղադրման համար կատարվող ծախսերի կեսը: Մյուս մասը՝ ըստ հայտատուի ցանկության, պետության կողմից կարող է տրամադրվել փոխառությամբ»,- ասում է Գ. Վերանյանը:
Նրա խոսքով հանրապետությունում կաթիլային ոռոգման համակարգի տեղադրման ծրագիրը սկսվել է նախորդ տարվանից: Արդյունավետ ոռոգումն ապահովելու համար անցյալ տարի կաթիլային համակարգ է ներդրվել ընդհանուր շուրջ 45 հա տարածքում՝ 25 հա ծխախոտի դաշտերում և 20 հա այգիներում: «Այս տարի հայտագրման գործնթացը ավելի ակտիվ է ընթանում: Մեր մասնագետների կողմից հայտ ներկայացնող անձանց հետ կատարվում է քննարկում, տրվում խորհրդատվություն»,- նշում է Գ. Վերանյանը:
Դավիթ ԱԲԱՂՅԱՆ
