Արտակարգ եւ լիազոր դեսպան Արման Նավասարդյանի կարծիքով, հայկական դիվանագիտությունը վերջին 25 տարիներին երկու մեծ բացթողում է ունեցել. Հայաստանում Իսրայելի դեսպանություն չբացելը և Արցախը բանակցային գործընթացից դուրս թողնելը:
«Եթե երկրորդը շատ դժվար է շտկել, ապա առաջինը համեմատաբար հեշտ: Իսրայելն այն երկիրն է, որից մենք կարող ենք օգտվել մի քանի բնագավառներում՝ ՏՏ, բժշկություն, արտագաղթի կանխարգելման մոդելի յուրացում և այլն»,- այսօր «Հայելի» մամուլի ակումբում ասաց դիվանագետը:
Հիշեցնենք, վերջերս ՀՀ Արտաքին գործերի նախարար Էդվարդ Նալբանդյանի հրավերով եռօրյա պաշտոնական այցով Հայաստանում էր Իսրայելի տարածաշրջանային համագործակցության նախարար Ցախի Հանեգբին: Նա իր երկրի կառավարությունում մի քանի տարի զբաղեցրել է հետախուզության և անվտանգության հարցերի պատասխանատու նախարարի պաշտոնը: Երեւանում իսրայելցի պաշտոնյան հայտարարեց, որ հայ-իսրայելական հարաբերություններում «ճեղքում» է գրանցվել:
Հայ-իսրայելական հարաբերություններում ճեղքման հիմա գրանցվելն, ըստ Արման Նավասարդյանի, պայմանավորված է մի շարք աշխարհաքաղաքական գործոններով: Դեսպանը ճիշտ չի համարում, որ Հայաստանի արտաքին քաղաքականության հիմքում երեք խնդիր է դրվում`ցեղասպանության ճանաչում, հայ-թուրքական հարաբերություններ եւ Արցախի հարց: Ըստ նրա, կան բազմաթիվ այլ հարցեր, որոնք չլուծելով, մենք տանուլ ենք տալիս նաեւ այս հարցերում:
Մանրամասները` տեսանյութում
Նելլի ԳՐԻԳՈՐՅԱՆ
