Ինչպես ավելի վաղ հայտնել էինք, իրանական օրաթերթին տված հարցազրույցում ՀՀ նախագահ Սերժ Սարգսյանը նշել է. «ՀՀ-ն Եվրասիական տնտեսական միության շրջանակներում նախաձեռնել է Իրանի Իսլամական Հանրապետության հետ արտոնյալ առևտրային ռեժիմի շուրջ քննարկումներ»:
Թեմայի շուրջ Aravot.am-ը զրուցեց ՀՀ ԳԱԱ արևելագիտության ինստիտուտի ավագ գիտաշխատող, էներգետիկ աշխարհաքաղաքականության և միջազգային անվտանգության մասնագետ Արմեն Մանվելյանի հետ:
«ԵԱՏՄ-ն սկսել է բանակցություններ հարեւան պետությունների, այդ թվում՝ Չինաստանի եւ Վիետնամի հետ: Խոսքը վերաբերում է մաքսային տարանցմանը, կրկնակի հարկմանը: Հատկանշական է, որ Իրանի հետ բանակցությունները վարում է ՀՀ-ն՝ ԵԱՏՄ անունից: Սա առավելություն է ՀՀ-ի համար: Բանակցությունների շրջանակում Իրան-ՀՀ սահմանը դիտարկվում է որպես արտոնյալ սահման՝ Իրանից դեպի ԵԱՏՄ երկրներ ապրանքների արտահանման համար: Եթե առեւտրաշրջանառությունն իրականացվի ՀՀ սահմանով, մեր երկրի համար դա, բնականաբար, ձեռնտու է»,-մանրամասնեց Արմեն Մանվելյանը:
Փորձագետն անդրադարձավ նաեւ Իրանից ՀՀ տարածքով դեպի Եվրոպա գազի տարանցման ծրագրին, որի առնչությամբ, ի պատասխան լրագրողի հարցին, թե ինչու այն ձախողվեց, նախագահն ասել է. «Նման մեծածավալ նախագիծը պետք է բազմակողմանիորեն ուսումնասիրվի, հաշվարկվի, և եթե տնտեսապես շահավետ լինի բոլոր կողմերի համար, ապա՝ ինչու՞ ոչ։ Ձեր նշած հարցը ներկա պահին գտնվում է փորձագիտական քննարկումների մակարդակում»: Արմեն Մանվելյանը նկատեց. «Խնդիրն այն է, որ Եվրոպան հետաքրքրված չէ իրանական գազով: Այս տեսանկյունից Եվրոպան Իրանին երբեք չի դիտել որպես այլընտրանք: Եվրամիությունը նախ ինքը պետք է նման հարց դնի քննարկման եւ համապատասխան քաղաքական որոշում կայացնի»:
Լուիզա ՍՈՒՔԻԱՍՅԱՆ
