Այս ուտեստը կարող եք մատուցել եւ որպես խավարտ` տարբեր մսեղենի հետ, եւ որպես նախուտեստ, եւ որպես` ինքնուրույն ուտեստ` խաշած բրնձի հետ: Այն շատ համեղ է, շատ օգտակար եւ դիետիկ:
Դդմիկի փոխարեն կարող եք օգտագործել նաեւ ցուկինի` մուգ կանաչ կամ դեղին գույնի կեղեւով դդմիկը, որը նույնպես երբեմն հանդիպում է մեր սուպերմարկետներում:
Անհրաժեշտ մթերքները
Դդմիկ կամ ցուկինի- 3-4 հատ
Կարմիր սոխ-1 խոշոր գլուխ
Սխտոր- 1 պճեղ (պարտադիր չէ)
Բուսական յուղ- 4 -5 ճաշի գդալ
Կարմիր գինու քացախ- 3 ճաշի գդալ
Չորացրած ուրց կամ պրովանսյան խոտեր- 1 ճաշի գդալ
Աղ, սեւ եւ կարմիր պղպեղ` ըստ ճաշակի
Պատրաստման եղանակը
Դդմիկները լավ լվացեք: Կտրատեք բարակ շերտերով: Եթե ունեք գրիլ թավա, կարող եք պատրաստել գրիլ թավայի վրա` առանց ձեթի, ավելի դիետիկ կլինի: Հակառակ դեպքում` սովորական թավայի մեջ լցրեք 3-4 ճաշի գդալ բուսական յուղ եւ տապակեք դդմիկները`միջին ջերմաստիճանով:
Տապակված դդմիկները շարեք մատուցարանի մեջ: Շերտ-շերտ աղ եւ համեմունքներ լցրեք:
Երբ լրիվ կտապակեք, անցեք սոխի թանձրուկին: Սոխը կտրատեք մանր-մանր, լցրեք նույն թավայի մեջ, որում տապակել էիք դդմիկները (եթե գրիլ թավայում էիք տապակել, վերցրեք ուրիշ, սովորական թավա): 1-2 ճաշի գդալ բուսական յուղի մեջ շատ մարմանդ կրակով լավ տապակեք սոխը: Ավելացրեք չորացրած կանաչիները, սեւ եւ կարմիր պղպեղ, ապա` քացախը, որը կարող եք փոխարինել կարմիր չոր գինիով: Թողեք եփվի այնքան, որ քացախը գրեթե ամբողջովին գոլորշիանա: Պատրաստի թանձրուկը լցրեք դդմիկների վրա եւ մատուցեք:
Բարի ախորժակ:
Պատրաստեց Մելանյա ԲԱՐՍԵՂՅԱՆԸ
