Սևանցիներին ու Սևանի հյուրերին, ափին իրենց հանգիստը վայելողներին, այստեղով անցնող զբոսաշրջիկներին օգոստոսի 12-ին` Երիտասարդության միջազգային օրը, կմիավորի երկու փառատոն` երաժշտական և ձկան համտեսի: «Սևան» երիտասարդական ակումբ» ՀԿ-ի հեղինակած արդեն եռամյա կենսագրություն ունեցող «Սևան» երաժշտական փառատոնն այս տարի էլ մասնակիցներին հրավիրում է` վայելելու բարձրաճաշակ երաժշտություն:
Փառատոնի կազմակերպիչներից Մերի Մկրտչյանը նշում է, որ երիտասարդ մասնակիցները բեմ են դուրս գալու՝ հանրության ուշադրությանը նորովի ներկայացնելու դասական հայ երաժշտությունն ու ցանկացած այլ ժանրի օրիգինալ ստեղծագործություն: Մասնակցելու են ինչպես երաժշտախմբեր, այնպես էլ անհատ կատարողներ:
«Սևան» երաժշտական փառատոնի կազմակերպիչների հավաստմամբ` երաժշտության շուրջ միավորվելու գաղափարը ոչ միայն արդարացված է, այլ նաև անհրաժեշտ:
Սա միաժամանակ բարեկամության, նոր ծանոթությունների, հետագա համագործակցության լավագույն հարթակ է, որը նպատակ ունի տարեցտարի ընդլայնելու իր աշխարհագրությունը և լճի ափից մուտք գործելու քաղաք:
Երաժշտական փառատոնը զուգակցվելու է ձկան համտեսով:
«Փառատոնի շրջանակներում Սևանը հյուրընկալելու է Սեդրակ Մամուլյանի խոհարարական դպրոցի աշակերտներին՝ պատրաստելու համեղ տեղական ձկնային ուտեստներ փառատոնի քաղցած և հետաքրքրասեր այցելուների համար: Ընտանիքների համար կառաջարկվեն նաև զովացուցիչ ըմպելիքներ, տնական կոմպոտ, խորտկեղեն»,- ասում է «Սևան» երիտասարդական ակումբ» ՀԿ-ի նախագահ Գոհար Մնացականյանը:
Այս նախաձեռնությունը լճի բարիքները նորովի ներկայացնելու, ձկից պատրաստվող կերակրատեսակները համտեսելու, ինչպես նաև Սևանա լճին ևս մեկ անգամ շնորհակալություն հայտնելու ինքնատիպ հնարավորություն է:
Գոհար Մնացականյանի փոխանցմամբ` փառատոնի հիմնական նպատակից բացի, այն է` երևան հանել և բարձրացնել մեր ստեղծագործ հայ երիտասարդ տաղանդներին, փառատոնը նաև մեծ կարևորություն է տալիս Սևանա լճին՝ որպես ապագա սերունդների համար կարևոր բնական ռեսուրսի: Հետամուտ լինելով բնության պահպանությանը` «Սևան» երիտասարդական ակումբ» ՀԿ-ի կողմից մասնակիցներին տրամադրվելու են էկո-բաժակներ:
Օրվա ընթացքում կազմակերպվելու են նավակով շրջագայություններ՝ բացահայտելու լճի շրջակա տարածքներն:
Փառատոնի կազմակերպիչները բոլորին հրավիրում են Սևան` հանրային թիվ 1 լողափ, հանգստի մեկ օրն անցկացնելու առավել բովանդակալից և հետաքրքիր, նաև հիշեցնում են, որ մուտքն ազատ է և երեկոյան էլ կշարունակվի զվարճանքը DJ-ի մասնակցությամբ:
Ա. ՂՈՒԿԱՍՅԱՆ
