Միացյալ Նահանգներում չեն դադարում բանավեճերը միգրացիոն քաղաքականությունը փոխելու՝ հանրապետականների ծրագրի շուրջ, որը նախագահ Դոնալդ Թրամփն արդեն որակել է պատմական ու կենսական Ամերիկայի բարգավաճման համար:
Սենատորներ Թոմ Քոթոնի ու Դեյվիդ Պերդյուի՝ անցած շաբաթ ներկայացրած նախագիծը, մասնավորապես, առաջարկում է հիմնովին փոխել Նահանգներում մշտական բնակության իրավունք տալու կարգն ու «Գրին քարտի» խաղարկության կամ ընտանիքների վերամիավորման փոխարեն շեշտը դնել ներգաղթյալների հմտությունների, պրոֆեսիոնալ կարողությունների ու փորձառության վրա:
Նախագծով առաջարկվում է Կանադայի ու Ավստրալիայի նման սահմանել բալային համակարգ և մշտական բնակության իրավունք տալ նրանց, ովքեր մի շարք չափանիշների համապատասխանելով՝ ընդհանուր առմամբ 30 միավոր կունենան: Չափորոշիչներից են անգլերենի իմացությունը, բարձրագույն կրթությունը, Նահանգներում բարձր վարձատրվող աշխատանքի հրավերն ու երիտասարդ տարիքը: Կան նաև բոնուսներ, օրինակ՝ եթե Նոբելյան մրցանակակիր եք՝ արդեն ունեք 25, օլիմպիական մեդալի դեպքում՝ 15 միավոր:
«Մրցակցային այս համակարգով մենք նախապատվությունը կտանք նրանց, ովքեր կարող են խոսել անգլերեն, ֆինանսապես ապահով են և ունեն հմտություններ, որոնք անհրաժեշտ են ամերիկյան տնտեսությանը», – անցած շաբաթ հայտարարեց նախագահ Թրամփը: – «Օրենսդրական այս բարեփոխումը ցույց է տալիս մեր համերաշխությունը ամերիկացի աղքատ ընտանիքների հետ, նրանք արժանի են ունենալ միգրացիոն համակարգ, որը առաջին հերթին հաշվի կառնի նրանց կարիքները և Միացյալ Նահանգների շահերը կդասի ամեն ինչից վեր»:
Փոփոխության աջակիցները պնդում են՝ Ամերիկան այլևս լայնարձակ ու անսահման հնարավորություններով երկիր չէ, այլ զարգացած պետություն է՝ խիտ բնակեցված քաղաքներով ու գործազրկությամբ, և միգրացիոն քաղաքականությունը պետք է հաշվի առնի դա:
Նյութի մանրամասները կարդացեք «Ազատություն» ռադիոկայանի կայքում