Ադրբեջանագետ Գրիգորի Այվազյանն այսօր «Փաստարկ» մամուլի ակումբում լրագրողներին հայտնեց, որ կապ է պահպանում Ադրբեջանում բռնաճնշումների ենթարկվող տեղաբնիկների՝ թալիշների, լեզգիների, թաթերի հետ, որոնք օգնություն են ակնկալում Հայաստանից: «Մեծ հույսով են սպասում, որ ՀՀ-ից նրանց ինչ-որ ազդանշան կտան, որ համատեղ գործողություններ կլինեն, սակայն, ցավոք, այդ ամենը հասարակական մակարդակի վրա է միայն»,-նշեց Այվազյանը:
Նրա խոսքով՝ ՀՀ-ն պետք է իրական քայլեր ձեռնարկի. «Թալիշներն ու լեզգիներն իրական ուժ են ներկայացնում թվաքանակով: Պետք է կազմակերպել համապատասխան հանդիպումներ, խրախուսել գործողություններ, նյութական որոշակի օգնություն հատկացնել: Նստած նայում ենք, թե ոնց են հարեւան երկրում կոտորում մեր միակ դաշնակիցներին: Առայժմ խորհրդավոր լռություն է»:
Փորձագետն ընդգծեց, որ Հայաստանին պետք է ոչ թե ֆաշիստական Ադրբեջան, այլ Ադրբեջան՝ տրոհված փոքրիկ՝ բարեկամական պետությունների:
Լուիզա ՍՈՒՔԻԱՍՅԱՆ