Ուսանող մարզիկներն օգոստոսի 19-30-ը Թայվանի Թայբեյ քաղաքում կմասնակցեն ամառային համաշխարհային ուսանողական խաղերին: Հայաստանի ուսանողական մարզական ֆեդերացիայի փոխնախագահ եւ գործադիր տնօրեն Ռազմիկ Ստեփանյանը նշում է, որ մեր երկիրը ներկայացուցիչ կունենա յոթ մարզաձեւում՝ ծանրամարտ, թաեքվանդո, ձյուդո, մարմնամարզություն, ջրացատկ, ուշու եւ սուսերամարտ. «Թայբեյում հայ մարզիկները հանդես կգան Հայաստանի ավանդական մարզաձեւերում: Կմասնակցեն մեր ուժեղագույն մարզիկները, որոնք նաեւ ուսանող են, կամ նոր են ավարտել ԲՈւՀ-ը: Բոլորը տվյալ մարզաձեւերի հավաքական թիմերի անդամներ են: Մեծ արդյունքներ ենք ակնկալում: Աստված տա՝ նրանց նաեւ մարզական բախտը ժպտա:
Ուսանողական խաղերն ուժեղ մրցաշար է: Այն օլիմպիական խաղերից հետո երկրորդ ամենամեծ մարզական միջոցառումն է:
Բոլոր երկրները ներկայացնում են իրենց լավագույն մարզիկներին, իհարկե, եթե ուսանող են: Այս մրցումներին մասնակցում են օլիմպիական խաղերի, աշխարհի եւ մայրցամաքների առաջնությունների չեմպիոններ եւ մրցանակակիրներ»,- ասաց Ռազմիկ Ստեփանյանը:
Աշոտ ՀԱԿՈԲՅԱՆ