Լոնդոնի Վեսթմինսթերյան պալատի աշտարակին տեղադրված հանրահայտ «Բիգ Բեն» զանգը վերջին անգամ կհնչի օգոստոսի 21-ին, իսկ հետո աշտարակը կփակեն վերանորոգման նպատակով: Այս մասին հայտնում է «ՌԻԱ Նովոստին»՝ վկայակոչելով Բրիտանիայի խորհրդարանի մամուլի ծառայության հաղորդագրությունը:
Ենթադրվում է, որ վերանորոգումը կշարունակվի մինչև 2021թ., այդ ընթացքում, չհաշված առանձին բացառությունները, զանգը չի հնչի:
Աշտարակի գլխավոր զանգը՝ Բիգ Բենը, կշռում է 13,7 կգ: Զանգը գրեթե առանց ընդհատումների աշխատել է վերջին 157 տարիներին, վերջին անգամ պրոֆիլակտիկ աշխատանքների համար աշտարակը փակվել է 2007թ., իսկ ավելի լուրջ վերանորոգում տեղի է ունեցել ավելի քան 30 տարի առաջ՝ 80-ականների կեսերին:
«Հանրությունը հրավիրվում է նշելու այս կարևոր պահը և հավաքվելու Խորհրդարանական հրապարակում՝ մինչև 2021թ. վերադարձը վերջին անգամ լսելու Բիգ Բենի ձայնը»,- ասել է ժամի պահապան Սթիվ Ջագզը:
Աշտարակի վերանորոգման աշխատանքները սկսվել են 2017թ. սկզբին: Հաղորդվում է, որ դրանցով զբաղվում է տարբեր երկրներից հրավիրված մասնագետների թիմ, իսկ վերանորոգման արժեքը կկազմի 29 մլն ֆունթ սթեռլինգ, որը դուրս կգրվի խորհրդարանի բյուջեից:
Չնայած վերանորոգման աշխատանքներին՝ զանգը կարող է հնչել «հատուկ պահերի», օրինակ Նոր տարուն:
Պատրաստեց Վիկտորյա ԱՆԴՐԵԱՍՅԱՆԸ
