Աջափնյակ եւ Դավիթաշեն վարչական շրջանների ընդհանուր իրավասության դատարանում այսօր շարունակվեց 22-ամյա Լեւոն Սահակյանի սպանության գործի քննությունը: Մեղադրյալը Պատանի լրագրողների դպրոցի տնօրեն Վահան Ղազարյանն է, որը մեղադրանքը չի ընդունում: Հիշեցնենք, որ ըստ մեղադրական եզրակացության՝ նա մոտ մեկ տարի առաջ վիճաբանության և քաշքշուկի մեջ է մտել, որի ժամանակ իր մոտ առկա ծալովի դանակով մեկ անգամ հարվածել է Լեւոն Սահակյանի ոտքին և մեկ անգամ կրծքավանդակի շրջանին, որի հետևանքով Սահակյանը մահացել է: Խնդիրն այն էր, որ Լեւոնն իր ընկերոջ հետ գնացել էր Վահանի գրասենյակ՝ իր նշանածին աշխատավարձ չտալու հարցը պարզելու, ինչի ժամանակ տեղի է ունեցել միջադեպը:
Այս նիստում հարցաքննվեց վկա Վլադիմիր Մխիթարյանը, որը մեղադրյալ Վահան Ղազարյանի մորաքրոջ տղան է: Նա պատմեց, որ Վահանը դեպքի օրն ուշ երեկոյան զանգել է իրեն եւ ասել, որ խնդիր է եղել, վիճաբանել են, եւ կարիք կա, որ գա իրենց տուն: Այդ օրը, ըստ վկայի, Վահանն իրենց տուն է եկել, գիշերել, իսկ հաջորդ օրվա առավոտյան հանձնվել ոստիկանությանը:
Վլադիմիր Մխիթարյանը նշեց՝ Վահանը պատմել է, որ Լեւոն Սահակյանը եւս մեկ տղայի հետ եկել է իր մոտ՝ գրասենյակ. «Վեճ է սկսվել, ապակի է կոտրվել, ծեծկռտուք է եղել, իրար չեն հասկացել: Վահանին խփել են, ինքը ընկել է, ինչից հետո ինքը դանակով հարվածել է»: Վկայի խոսքով՝ Վահան Ղազարյանը ծանր, լարված վիճակում էր, վրան կապտուկներ կային, անընդհատ ծխում էր. «Անգամ մի քանի բաժակ օղի եմ հյուրասիրել նրան…Ընթացքում նա փորձում էր զանգելով տեղեկանալ, թե այդ տղան ինչ վիճակում է: Նա չէր ուզենա, որ նման դեպք լիներ»:
Թե ինչու է բանը հասել բռունցներին, ըստ վկայի՝ երիտասարդներն իրար չեն հասկացել. «Սկզբում Վահանին վիրավորել են, ի պատասխան՝ նա է վիրավորել, ու ծեծկռտուք է սկսվել»: Վկան նաեւ հաստատեց, որ վիճաբանությունը սկսվել է աշխատավարձ չվճարելու շուրջ խոսակցության պատճառով:
Լուիզա ՍՈՒՔԻԱՍՅԱՆ
