ՊՆ նախկին փոխնախարար, «Զինված խմբի» գործով ամբաստանյալ Վահան Շիրխանյանն իր պաշտպաններին կարեւոր տեղեկություն է հայտնել, որի մասին պաշտպանները չեն շտապում բարձրաձայնել:
Շիրխանյանի պաշտպան Աննա Մարալյանն այսօր լրագրողների հետ զրույցում պատմել է նախօրեին իր վստահորդի հետ ունեցած հանդիպման մանրամասները. «Պարոն Շիրխանյանը տեղեկացրեց, որ բուժում չկա, հսկողությունը նույնպես չէինք ասի, որ համապատասխանում է պահանջներին: Նրա առողջական վիճակն ավելի է վատացել, որովհետեւ մեջքի ցավերն ավելի սուր են: Այլ տեղեկատվություն նույնպես տրամադրվեց, որը դեռ չենք կարող հրապարակել»:
Հիշեցնենք, որ պաշտպանները տեւական ժամանակ չէին կարողանում տեսակցել Շիրխանյանի հետ, ըստ փաստաբանի՝ խնդիրը լուծվել է երկու օր առաջ. «Նախորդ դատական նիստից հետո մուտքագրվեց դիմում, որով խնդրել էինք թույլատրել հանդիպել Շիրխանյանի հետ, երեկ չէ առաջին օրը դատարանից զանգեցին ու հայտնեցին, որ կարող ենք թույլտվությունը վերցնել: Նույն օրը վերցրել ու տեսակցել ենք Շիրխանյանի հետ, երեկ էլ ենք հանդիպել ու քննարկել հարցեր, որոնք որ անհրաժեշտ էին»:
Անդրադառնալով ՄԻԵԴ ներկայացրած իրենց գանգատին՝ փաստաբանն ասաց, որ իրենք դեռ չունեն պետության պատասխանը. «Պետությունը խնդրել է երկարաձգել, ինչի մասին մենք տեղյակ չէինք: Այն հարցերը, որոնք քննարկել ենք պարոն Շիրխանյանի հետ՝ առողջական վիճակի, պայմանների վերաբերյալ, բոլորը կներկայացնենք դատարան ու Վահան Շիրխանյանի բոլոր դիտարկումները հաշվի կառնենք» :
Արփինե ՍԻՄՈՆՅԱՆ
