Ավան եւ Նոր Նորք վարչական շրջանների ընդհանուր իրավասության դատարանում այսօր 2016թ. Ոստիկանության ՊՊԾ գունդը գրաված «Սասնա ծռեր» զինված խմբի անդամներից 18-ի գործով դատական նիստում ամբաստանյալների պաշտպանները դատավոր Արտուշ Գաբրիելյանին ինքնաբացարկի միջնորդություն ներկայացրեցին, քանի որ վերջինս մերժեց պաշտպաններից մի քանիսի բացակայության պայմաններում նիստը հետաձգելու՝ ավելի վաղ ներկայացված միջնորդությունը: «Դուք շահագրգռված եք այս գործի ելքով»,-դատավորին ասաց ինքնաբացարկի միջնորդություն ներկայացրած փաստաբան Լիպարիտ Սիմոնյանը: Մյուս պաշտպանները միացան միջնորդությանը:
«Տպավորություն է, որ դատավորի եւ փաստաբանների քրեական դատավարության օրենսգրքերը տարբեր են»,-նկատեց փաստաբան Նինա Կարապետյանցը:
Փաստաբան Լուսինե Սահակյանն էլ իր հերթին ասաց. «Այս նիստը շարունակելն իսկ ապօրինություն է: Ես չեմ մասնակցելու այս նիստերին, քանի դեռ դուք խախտում եք մեր եւ մեր պաշտպանյալների իրավունքները»: Լուսինե Սահակյանն այնուհետեւ հեռացավ նիստերի դահլիճից:
Վերադառնալով խորհրդակցական սենյակից՝ դատավոր Արտուշ Գաբրիելյանը որոշեց մերժել իր դեմ ներկայացված ինքնաբացարկի միջնորդությունը: Այնուհետեւ նա մերժեց նաեւ ամբաստանյալներին նիստերի դահլիճ վերադարձնելու միջնորդությունը: Հիշեցնենք, որ դատարանի հանդեպ անհարգալից վերաբերմունքի համար այս գործով բոլոր ամբաստանյալները որոշակի ժամանակով հեռացված են նիստերից:
Լուիզա ՍՈՒՔԻԱՍՅԱՆ
