Նորք Մարաշում վնասազերծված «Զինված խմբի» գործով ամբաստանյալ Տիգրան Բոյաջյանը, ում ամբաստանյալներից Նելլի Մինասյանը մեղադրում է սուտ ցուցմունք տալու համար, այսօր իր հերթին Նելլիին մեղադրեց ուղղորդված հայտարարություններ անելու մեջ:
«Մեղադրանքը չգիտեմ՝ ինչու է ինձ ուղղվում, փորձ է արվում առանցքային անձանցից սլաքներն ուղղել ինձ վրա, ինձ մեղավոր ներկայացնել, իրենց՝ անմեղ, Նելլին ուղղորդված է»,- այսօր դատարանում լրագրողներին ասաց Տիգրան Բոյաջյանը:
Հարցին՝ ում կողմից է ուղղորդված կամ ովքեր են առանցքային մարդիկ, Տիգրան Բոյաջյանը պատասխանեց. «Անուններ չեմ ուզում տալ, բոլորի համար էլ պարզ է՝ ովքեր են առանցքային անձինք, չգիտեմ՝ ինչու է փորձում միայն ինձ մատնանշել»: Թե ինչու է նախաքննական ցուցմունքում խոստովանել ու ընդունել իր մեղքը՝ Տիգրան Բոյաջյանը պարզաբանեց՝ «Նախնական ցուցմունքում մեղքս ընդունել եմ՝ իրավական առումով շատ բան չհասկանալով, թերի ստանալով մեղադրանքը: Թերի եմ հասկացել առաջադրված մեղադրանքը»:
Արփինե ՍԻՄՈՆՅԱՆ
