Ըմբշամարտը, հատկապես հունահռոմեական ոճի, կորցրել է դիտարժանությունը՝ վերածվելով սումոյի նման ինչ որ բանի: Այսպես մտածում է ազգային ֆեդերացիաների եւ մասնագետների ճնշող մեծամասնությունը: Վերջիններն արդեն քանի տարի դիմում են Ըմբշամարտի համաշխարհային միությանը՝ կանոնները փոփոխելու պահանջով:
Փարիզում ըմբշամարտի աշխարհի առաջնությանը զուգահեռ անցկացվեց UWW համաժողովը, որտեղ սառույցը, կարծես, կոտրվեց:
Ազատ ոճի ըմբշամարտի Հայաստանի երիտասարդական հավաքականի ավագ մարզիչ, միջազգային օլիմպիական կարգի մրցավար Ավետիք Վարդանյանը, որը նույնպես Փարիզում էր որպես մրցավար եւ քաջատեղյակ համաժողովի աշխատանքներին, Aravot.am-ին պատմեց ակնկալվող փոփոխությունների մասին: «Նախնական տարբերակով 2018 թ. հունվարի 1-ից հունահռոմեական ըմբշամարտ կվերադարձվի պարտեր դրությունը, բայց ոչ թե չորեքթաթ դիրքով, ինչպես նախկինում էր, այլ՝ պառկած: Իսկ մրցակիցն աշխատել սկսելու է կողքից, ոչ թե թիկունքից: Առաջին երկու րոպեներին միավոր չլինելու դեպքում նախատեսվում է պասիվ ըմբիշին նկատողություն հայտարարել եւ իջեցնել պարտեր դիրք, իսկ ակտիվ ըմբիշին տալ մեկ միավոր: Երկրորդ մրցափուլում պասիվ մարզիկին կտրվի պարտեր դրություն, մրցակցին՝ մեկ միավոր: Բայց դա կլինի երկրորդ մրցափուլի ոչ թե վերջին րոպեին, այլ գոտեմարտի 4 րոպե 30-րդ վայրկյանին: Կանոնների փոփոխության այս նախնական տարբերակները ուժի մեջ մտնելու են եկող տարվա հունվարի 1-ից: Բայց վերջնական հաստատված կանոնները UWW-ն ազգային ֆեդերացիաներին պետք որ ուղարկի մինչեւ դեկտեմբեր:
Բոլոր ոճերում քաշային կարգերն ավելանում են՝ ութից հասնելով տասի. ազատ ոճում 57-61-65-70-74-79-86-92-97-124, հունահռոմեականում՝ 55-60-63-67-73-77-82-87-97-130:
Եվ վերջինը. 2018 թվականին մրցումներն անցկացվելու են երկու օր կշեռքով. առաջին օրը մարզիկները պետք է մաքուր քաշ ունենան, երկրորդ օրը, ովքեր պայքարելու են մեդալների համար՝ երկու կիլոգրամ ավելի կշռելու իրավունք կունենան: Այս կարգը կգործի մինչեւ 2018 թվականի վերջը: 2019 թվականից երկու կիլոգրամ ավելի հասկացությունը կհանվի: Այսինքն, ըմբիշները երկու օրն ել պետք է տեղավորվեն սահմանված «մաքուր քաշի» սահմաններում», – ասաց Ավետիք Վարդանյանը:
Աշոտ ՀԱԿՈԲՅԱՆ
