Այսօր Կենտրոն եւ Նորք-Մարաշ վարչական շրջանների ընդհանուր իրավասության դատարանում Սամվել Բաբայանի «Իգլայի» եւ փողերի լվացման գործով դատավարությունն էր:
Հրապարակվեցին մեղադրանքի որոշումները:
Գործով ամբաստանյալներից մի մասը որեւէ դիրքորոշում չհայտնեց՝ իրենց մեղավոր ճանաչում են, թե ոչ: Ժորա Զաքարյանն ասաց, որ մեղավոր է իրեն ճանաչում մասնակի: Թե որ հարցում է մեղավոր ճանաչում, որ հարցով ոչ՝ նա չպարզաբանեց, միայն հայտարարեց. «Դե որ մտանք էդ գործի մեջ, էլի, պիտի չմտնեինք»:
Երբ մեղադրող դատախազը կարդում էր մեղադրանքը, թե ինչպես են Սամվել Բաբայանի պատվերով ապօրինի ճանապարհով ձեռք բերված փողերը տարել, քիմիական ճանապարհով լվացել, ինչպես են «Իգլայի» խողովակ բերել, թաղել հողի մեջ, նկարել եւ այլն, Սամվել Բաբայանն ու Սանասար Գաբրիելյանը ժպտում էին ու քմծիծաղ տալիս:
Սանասար Գաբրիելյանը դատավորի հարցին՝ մեղադրանքը հասկանալի՞ է, առաջադրված մեղադրանքում դուք ձեզ մեղավոր ճանաչո՞ւմ եք, թե՞ ոչ՝ պատասխանեց՝ «Հասկանալի չի մեղադրանքը»: Դատավորը պարզաբանեց, որ խոսքը վերաբերում է ռազմանյութեր ձեռք բերելուն, փոխադրելուն եւ պահելուն՝ Սանասար Գաբրիելյանն արձագանքեց. «Բայց մեղադրողն ավարտե՞ց իրա խոսքը, ավարտե՞ց, ըտեղ էլի բան կա մեղադրանքի մեջ, մոռացավ: Ցած է ընկնում երեք խնձոր, մեկն՝ ասողին, մեկը՝ լսողին, մեկն էլ հորինողին»:
Նա ասաց, որ իրեն երբեք մեղավոր չի ճանաչի առաջադրված մեղադրանքներում:
Հռիփսիմե ՋԵԲԵՋՅԱՆ
