«Քրդական ինքնավարության ստեղծմամբ, ինչն առաջին համաշխարհային պատերազմից հետո ամենանշանակալի փոփոխությունն է տարածաշրջանում, վերակենդանանալու է հայկական հարցը: ԱՄՆ-ն թեեւ հանդես է գալիս Իրաքյան Քուրդիստանի անկախացման դեմ, սակայն գործընթացն անխուսափելի է»,-«Փաստարկ« մամուլի ակումբում այսօր նման կարծիք հայտնեց քաղաքագետ Արա Պապյանը: Հիշեցնենք, որ սեպտեմբերի 25-ին Իրաքյան Քուրդիստանում անկախության հանրաքվե է նախանշված:
Ըստ Արա Պապյանի՝ այս փաստն Արցախյան հակամարտության վրա չի կարող ազդեցություն չունենալ. «Քրդական պետության հարցն ավելի մեծ է, քանի Արցախինը: Սակայն քրդական պետության հարցը մեծացնում է ՀՀ դերն ու նշանակությունը տարածաշրջանում: ՀՀ-ն Արեւմուտքին պետք է՝ քրդերի հետ հետագա հարցերի համար»:
Արա Պապյանը մանրամասնեց. «Արեւմուտքն ունի փորձ առ այն, որ այն պահին, երբ Թուրքիան դառնում է ուժեղ եւ ինքնաբավ, դառնում է վատ կառավարելի եւ ինքնագլուխ: Էրդողանի վերջին հոխորտալից հայտարարությունները Գերմանիայի առնչությամբ դրա մասին են վկայում: Հզոր Թուրքիային փոխարինել Քրդստանով՝ նշանակում է գլխացավանքը փոխարինել մեկ այլ գլխացավանքով: Այսինքն, Արեւմուտքի համար քրդական պետությունը չպետք է լինի այնքան հզոր, որ չենթարկվի իրեն: Իսկ գլխացավանքին պետք է հակակշիռ, ուստի ԱՄՆ-ի համար ՀՀ-ն պետք է լինի ավելի մեծ եւ հզոր, որ հակակշռի Քրդստանին»:
Քաղաքագետի խոսքով՝ այդ է վկայում ՀՀ-ում ԱՄՆ դեսպանի վերջին հարցազրույցը, որում նա շեշտում է՝ ԱՄՆ-ն պատրաստ է ՀՀ-ին տալ ինքնիշխանությանը միտված գործիքներ. «Ամերիկացիներն արդեն կասկածում են, որ ՀՀ-ն այլեւս ինքնիշխան երկիր չէ եւ Ռուսաստանի մասն է: Լրջագույն ճամփաբաժանի առաջ ենք»:
Լուիզա ՍՈՒՔԻԱՍՅԱՆ
