Չարենցի անվան թիվ 67 դպրոցի տնօրեն Անահիտ Խեչումյանը «Իրազեկ քաղաքացիների միավորում» ՀԿ համակարգող Դանիել Իոաննիսյանի հրապարակած դպրոցի տնօրենների հայտնի ձայնագրությունների ցուցակում էր:
Այսօր ԿԳ նախարարության հրավիրած խորհրդակցությանը նա մասնակցում էր:
Տնօրենը, մեզ հետ զրույցում անդրադառնալով այդ ձայնագրություններին՝ ասաց. «Ես ոչ այնքան մեղադրում եմ պարոն Դանիելին, որքան հասարակության ռեակցիային, որովհետեւ հասարակությունը սիրում է լսել մի բառ եւ ուռճացնել, այ դա է պատճառը, որ ուսուցչի վարկն ընկնում է: Եվ շատ ավելի լավ կլիներ, որ հասարակությունը ճիշտ արձագանք տար պարոն Դանիելի այդ մեկնաբանություններին: Յուրաքանչյուր մարդ ազատ է իր աշխատանքային գործունեությունից հետո զբաղվելու ինչով ուզում է՝ առանց վնասելու որեւէ մեկի անձը: Եթե մարդը տնօրեն է, պիտի կարողանա իր իրավունքները պաշտպանել՝ հասկանալով, որ ուսուցիչը, տնօրենը այնքան ժամանակ չունի, որ բոլոր արձագանքներին հասարակության ընթացք տա եւ զբաղվի նման մանր բնույթի խոսակցություններով»:
Նա ասաց, որ Դանիել Իոաննիսյանի գործողությունը չի դատապարտում. «Իր աշխատանքն է, ես ավելի շատ ցավ եմ ապրում հասարակության արձագանքից»:
Հարցին՝ այսինքն, անօրինական ոչինչ չե՞ք գտնում Իոաննիսյանի արածում՝ Անահիտ Խեչումյանը պատասխանեց. «Ինչո՞ւ, գտնում եմ, նա պիտի մտածեր սոցիալական ցանցերում իր տեսակետները ցույց տալուց առաջ: Մտածեր՝ իր ընտրած ճանապարհները արդյոք ընդունելի՞ են: Կան բարոյական նորմեր, ինքը բարոյական նորմերը խախտեց միանշանակ, հո միայն օրենքը չի՞»:
Դիտարկմանը, որ ինքն էլ կարծում է, որ ուսուցչի ՀՀԿ-ական լինելն է խախտում բարոյական նորմերը՝ տնօրենը արձագանքեց. «Կարծելը շատ քիչ հիմք է՝ մարդկանց վիրավորելու համար: Երբ որ ինքը հայտարարությունը տեղադրեց ֆեյսբուքյան ցանցում, հաջորդ օրը ես բացեցի եւ քիչ էր մնում ուղղակի հիասթափություն ապրեի մեր հասարակությունից, այդ արձագանքներից: Ես ցավ զգացի, որ գուցե այդ արձագանքողներից մեկը լիներ իմ դպրոցի աշակերտը: Ուրեմն մեր հասարակությունը դեգրադացվում է»:
Ըստ տնօրենի, իր աշխատանքում երեւալու համար սեւացնում են մյուսներին, ինչն ընդունելի չէ: Մենք ճշտեցինք՝ կոնկրետ արձագանքներից ձեզ ի՞նչն է վիրավորել՝ տիկին Խեչումյանը պատասխանեց. «Ասեմ՝ երբ որ ես բաց արեցի ֆեյսբուքյան էջը, նկարիս տակ գրված էր՝ աղբ: Ավելի վիրավորական բառ ես իմ կյանքում չէի կարող հանդիպել: Ես աղբ չեմ, ես իմ ողջ գործունեությամբ ցույց եմ տալիս, որ ես հանուն երկրի պատրաստ եմ նույնիսկ իմ կյանքը զոհել, աղբը նման բանի ընդունակ չէ»:
Հռիփսիմե ՋԵԲԵՋՅԱՆ
Եվ սա դեռ իրեն համարում է բարոյական մարդ եվ կոչվում է ուսուցիչ?; Խոսում է բարոյական դեգրադացիայից; երբ իրենք պատրաստակամորեն’ մասնագիտական գործունեության հետ բացարձակ կապ չունեցող գործունեություն ծավալելով; մարդկանց վախեցնելով ու կաշառք տալով լծվեցին երկիրը կործանող ուժերի սայլին: Անգամ համարում է; որ իրենց անբարոյական արարքներն ի ցույց դնելն անօրինականություն էր?; Եվ ինչ օրինակ ես ցույց տալիս դու’ ուսուցիչ կոչեցյալդ; հանուն փողի; պաշտոնի ոտնատակ տալ ամեն սրբություն ու արժեք?: Ահա դա է ձեր բոլորի էությունը!: Ուրեմն մի նեղսրտվիր ճիշտ բնորոշումներց