«Ինձ թվում է՝ երեխաների համար կարեւոր է, որ լինի խաղաղություն, որ կարողանան հանգիստ կյանքով ապրել ու սովորել, ծնողների ու երեխաների համար էլ կարեւոր է մեր երկրի զարգացումը: Կգանք, կհասնենք ապրիլին, բոլորս միասին կընտրենք մեր վարչապետին: Հանրապետականը միատարր է եւ ունի մեկ ընդհանուր կարծիք, որը կձեւավորվի ապրիլին»,- այսօր այս մասին լրագրողների հետ զրույցում ասաց ԱԺ նախագահ Արա Բաբլոյանը՝ պատասխանելով հարցին, թե ով է վարչապետի հավանական թեկնածուն:
Կրթական համակարգը ձեզ բավարարո՞ւմ է՝ հաշվի առնելով վերջին փոփոխությունների շուրջ սկսված քննադատությանը հարցին էլ ԱԺ նախագահը պատասխանեց. «Կրթական համակարգը չի կարող լինել քարացած, մշտական զարգացման կարիք ունի եւ մշտական պրպտումները տալիս են հնարավորություն, որ ավելի բարելավվի կրթական համակարգը»:
Ինչ վերաբերում է «Ժառանգության» հայտարարությանը, թե սեպտեմբերից փողոցային պայքար են սկսելու՝ թույլ չտան Սերժ Սարգսյանին դառնալ վարչապետ, Արա Բաբլոյանն արձագանքեց. «Ես չեմ պատկերացնում՝ ինչ պատճառով պետք է հատուկ ակցիաներ լինեն: Ազատ եւ ժողովրդավարական երկիր է, բոլոր կարծիքները կարող են քննարկվել»:
Արփինե ՍԻՄՈՆՅԱՆ
